د افغانستان د بهرنیو چارو وزارت یوه لوړپوړي پلاوي د بلجیم پلازمېنې بروکسل ته د سفر پر مهال د اروپايي ټولنې له چارواکو سره په دغه قاره کې د مېشتو افغانانو او په ځانګړي ډول د کډوالو د وضعیت په اړه خبرې اترې وکړې.
د افغانستان د بهرنیو چارو وزارت چارواکو پر اېکس (پخواني ټویټر) په خپلو پاڼو کې اروپا ته د دغه پلاوي د سفر په اړه جزیات شریک کړي دي. د راپور له مخې، افغان پلاوي په بروکسل کې د اروپايي ټولنې له چارواکو سره په اروپا کې د مېشتو افغان اتباعو پر وړاندې پرتې ننګونې وڅېړلې.
د دغه پلاوي مشر او د بهرنیو چارو وزارت ویاند، عبدالقهار بلخي وویل چې بروکسل ته یې دغه سفر د اروپايي ټولنې په رسمي بلنه ترسره کړی او اوس پای ته رسېدلی دی.
بلخي زیاته کړه چې دوی د اروپايي ټولنې د غړو هېوادونو له استازو سره څو اړخیزې او دوه اړخیزې ناستې درلودې. په دې لیدنو کې په اروپا کې مېشتو افغان اتباعو ته د کونسلي خدماتو د بیا پیلولو، د باور فضا رامنځته کولو او د هغو افغانانو د ستونزو د حل لپاره چې د پناه غوښتنې غوښتنلیکونه یې ورکړي، پر بېلابېلو لارو چارو بحث وشو.
بلخي وویل: "موږ هیله لرو چې دا پروسه به د مثبتې همکارۍ لپاره نوې لارې پرانیزي، په بهر کې د مېشتو افغانانو د ستونزو حل به اسانه کړي او د متقابل احترام او ګډو ګټو پر بنسټ به د همکاریو ساحه نوره هم پراخه کړي."
د بهرنیو چارو وزارت یو بل چارواکي، ذاکر جلالي پر اېکس په خپله پاڼه دا سفر د افغانستان او اروپايي ټولنې ترمنځ په اړیکو کې یو مهم "بدلون ټکی" وباله. هغه یادونه وکړه چې دا بروکسل ته د افغانستان د اوسني حکومت د یوه پلاوي لومړی رسمي سفر و.
جلالي په خپلو خبرو کې وویل: "زه هیله من یم چې دا سفر به د متقابل احترام او ګډو ګټو پر بنسټ د یوې لا ډېرې عملي (پراګماټیکې) او تلپاتې همکارۍ لاره هواره کړي او په ورته وخت کې به په اروپا کې افغانانو ته مرسته وکړي چې د اعتماد وړ کونسلي خدماتو او له خپل هېواد سره د اړیکو اغېزمنو لارو ته لاسرسی ومومي."
