د ایراني رسنیو د راپورونو له مخې، د امریکا د مرکزي قوماندانۍ لخوا د تایید شویو بریدونو وروسته د ایران پر قشم ټاپو چاودنې شوې دي؛ دغې قوماندانۍ ویلي چې په نښه شویو اهدافو کې د ایران توغندیو لانچرونه او ډرون کښتۍ شاملې وې.

د دې بریدونو په ځواب کې، د ایران د انقلابي ګارډ ځواکونو په کویټ کې د امریکا پر اډو د توغندیو بریدونه وکړل.

د کویټ هوايي دفاعي ځواکونو دغه راغلي توغندي شنډ کړل او چارواکو وویل چې هیڅ امریکایي پرسونل ته زیان نه دی رسېدلی.

دواړه غاړې د سولې یوې هوکړې ته د رسېدو لپاره په خبرو اترو بوختې دي؛ دا جګړه په فبروري میاشت کې پر ایران باندې د امریکا او اسرائیل له بریدونو وروسته پیل شوې وه، سره له دې چې د اپرېل پر ۸مه د پاکستان په منځګړیتوب د اوربند یوه هوکړه هم شوې وه.

روبیو د غزې د ۷۰ سلنه اشغال په اړه د نتانیاهو پلان رد کړ، دا د امریکا پلان نه دی

د امریکا د بهرنیو چارو وزیر مارکو روبیو د کانګرس ته وویل، د غزې د ۷۰ سلنه برخې د اشغال په اړه د اسرائیل د لومړي وزیر بنیامین نتانیاهو وړاندیز، د جګړې د پای ته رسولو لپاره د ټرمپ د ادارې د پلان "برخه نه ده".

روبیو د بشري وضعیت په اړه د سختو پوښتنو سره د مخامخ کېدو پر مهال دا ادعاګانې رد کړې چې ګواکې د ټرمپ ادارې د دغې سیمې کړکېچ ته پام نه دی کړی.

کله چې د فلسطین د خاورې د "واکمنۍ ترلاسه کولو" په اړه د نتانیاهو د لارښوونې په تړاو تر فشار لاندې راوستل شو، هغه بیا ټینګار وکړ: "دا د دې پلان برخه نه ده."

سره له دې چې اوربند د ۲۰۲۵ کال د اکتوبر پر ۱۰مه نافذ شوی و، خو اسرائیل په خپلو نږدې ورځنیو بریدونو او د اوربند په سرغړونو کې ۹۳۲ فلسطینیان وژلي دي.

په آلمان کې په ۲۰۲۵ کال کې د تبعیض د شکایتونو ریکارډ ثبت شوی

د آلمان د تبعیض ضد ادارې په ۲۰۲۵ کال کې د مرستې لپاره ریکارډ ۱۳,۰۶۷ غوښتنې ترلاسه کړې دي، چې پدې کې ۴,۵۷۱ رسمي شکایتونه شامل دي، او ۴۳ سلنه یې له نژادي تبعیض سره تړاو لري.

د تبعیض ضد فدرالي کمیشنرې فردا اتامان وویل، نژاد پالي چلندونه په زیاتېدونکي توګه د بنسټیز کېدو په حال کې دي او خبرداری یې ورکړ چې دا چاره د تبعیض د لا سختو ډولونو لامل کېږي.

هغې هغو پېښو ته اشاره وکړه چې پکې په کار ځای کې سپکاوی، د کور په ترلاسه کولو کې تبعیض او د ظاهري بڼې، توکم یا مذهب پر بنسټ روغتیايي خدماتو ته غیر مساوي لاسرسی شامل دي.

هغې د قوي قانوني اقداماتو غوښتنه وکړه او ویې ویل: "نژاد پرستي او تبعیض په خپله له منځه نه ځي، په ځانګړې توګه داسې وخت کې چې خلک احساس کړي تبعیض بې سزا پاتې کېږي." هغې دا خبرداری هم ورکړ چې د کډوالو ضد احساساتو زیاتوالی ټولنې او اقتصاد دواړو ته زیان رسوي.

سپېس ایکس (SpaceX) په ناسداک (Nasdaq) آی پي او کې د ۷۵ میلیارد ډالرو د راټولولو هدف لري

د راپورونو له مخې، د فضايي توغندیو او سټلایټونو جوړولو شرکت سپېس ایکس، چې د ایلن مسک لخوا تاسیس شوی، په یو لوی او تاریخي آی پي او (IPO) کې د ۱.۷۵ ټریلیون ډالرو د ارزښت د نښه کولو هدف لري چې تمه کېږي لږ تر لږه ۷۵ میلیارد ډالر راټول کړي.

دا وړاندیز به ټول عواید مستقیم شرکت ته راوړي، په داسې حال کې چې د شرکت اوسني ونډه وال به د مرحلې په توګه له محدودیتونو سره مخ شي.

د پانګوالو لپاره د مالوماتو وړاندې کولو لړۍ  د پنجشنبې په ورځ پیل کېږي او تمه ده چې د جون په ۱۲مه په ناسداک بازار کې د "SPCX" نښې لاندې سوداګري پیل کړي.

سپېس ایکس ۴.۶۹ میلیارد ډالر عواید راپور کړي، خو زیانونه یې هم پراخ شوي دي.

دا لیست کېدل ښايي نور لوی شرکتونه هم ورته ګام پورته کولو ته وهڅوي، په شمول د چیټ جي پي ټي (ChatGPT) د اصلي شرکت اوپن آی (OpenAI) او د انتراپیک (Anthropic) احتمالي وړاندیزونه.

ولسمشر اردوغان له  پاشینیان سره  د تورکیې او ارمنستان د اړیکو د عادي کولو پر ګامونو خبرې وکړې

د تورکیې د عامه اړیکو ریاست د معلوماتو له مخې، د تورکیې ولسمشر رجب طیب اردوغان او د ارمنستان لومړي وزیر نیکول پاشینیان په یوه ټیلیفوني خبرو کې پر دوه اړخیزو اړیکو او سیمه ییزو پرمختګونو خبرې وکړې.

ولسمشر اردوغان وویل چې د انقرې او یریوان ترمنځ د اړیکو د عادي کولو بهیر مخ په وړاندې روان دی او هڅې پر دې تمرکز لري چې مستقیمه سوداګري شونې شي او خپلمنځي تعامل پیاوړی شي.

هغه د سیمې د سولې او ټیکاو په اړه د تورکیې پر ژمنتیا یو ځل بیا ټینګار وکړ.

پاشینیان د دې ټیلیفوني خبرو پر مهال ولسمشر اردوغان ته د  لوی اختر مبارکي هم وویله.

د ۲۰۲۰ کال د قره باغ له جګړې وروسته د خبرو اترو د بیا پیلېدو راهیسې، د دواړو هېوادونو ترمنځ اړیکې په تدریجي ډول ښې شوې دي، چې پدې کې د باور جوړونې اقدامات لکه مستقیمې الوتنې، د ویزو اسانتیاوې او د پولو د زیربناوو نوښتونه شامل دي.