"اسلام اباد وايي، په دغو بریدونو کې یې د ټي ټي پي (TTP) وسله وال په نښه کړي، خو افغان حکومت وايي چې د پاکستان هوايي بریدونو په کابل او سرحدي ولایتونو کې استوګنیزو کورونو په نښه کړي دي.
افغان چارواکو ویلي چې پاکستان پر کابل او یو شمېر سرحدي ولایتونو نوي بریدونه کړي، چې په پلازمېنه کې یې څلور کسان وژلي دي. د کابل د امنیې قوماندانۍ ویاند خالد ځدراڼ ویلي، چې په پلازمېنه کې پر استوګنیزو کورونو د بمبارۍ له امله څلور کسان وژل شوي او ۱۵ نور ټپیان دي.
یوه پاکستاني امنیتي چارواکي، چې د نوم نه ښودلو په شرط یې خبرې کولې، تایید کړه چې پاکستان تېره شپه بریدونه کړي او ویلي یې دي چې هدف یې د پاکستاني طالبانو (TTP) ترهګره ډله وه.
اسلام اباد تېره میاشت پر خپل ګاونډي هېواد د هوايي بریدونو یوه څپه پیل کړه او ویې ویل چې دا عملیات په پاکستان کې د بریدونو له زیاتېدو وروسته وسله وال په نښه کوي. په کابل کې د طالبانو تر مشرۍ لاندې حکومت په پاکستان کې په بریدونو کې هر ډول لاس لرل رد کړي دي.
د طالبانو د حکومت ویاند ذبیح الله مجاهد پر ایکس (پخواني ټویټر) لیکلي چې د پاکستان هوايي بریدونو سویلي ولایت کندهار هم په نښه کړی دی. هغه وویل چې په دغو بریدونو کې د پکتیا او پکتیکا ختیځ ولایتونه هم په نښه شوي چې له پاکستان سره پوله لري.
پاکستان ټینګار کړی چې عملیات یې پر ترهګرو ډلو متمرکز دي او وايي چې ملکي وګړي یې نه دي وژلي.
په وروستیو اونیو کې افغان او پاکستاني ځواکونو په سرحدي سیمو کې نښتې هم کړي، چې سوداګري یې ګډوډه کړې او د پولې نږدې اوسېدونکي یې له خپلو کورونو تېښتې ته اړ کړي دي.
په افغانستان کې د ملګرو ملتونو مرستندویه پلاوي (یوناما) ویلي چې د فبرورۍ له ۲۶مې د مارچ تر ۵مې پورې د پاکستان په پوځي عملیاتو کې د ۲۴ ماشومانو په ګډون لږ تر لږه ۵۶ ملکي وګړي وژل شوي دي. د ملګرو ملتونو د کډوالو ادارې ویلي چې د دې جګړو له امله شاوخوا ۱۱۵۰۰۰ (یو لک او پنځلس زره) کسان بې ځایه شوي دي."
