د تورکیې د بهرنیو چارو وزیر خاقان فیدان د هرمز له تنګي څخه د خوندي، بې خنډه او ازاد تګ راتګ او د جګړې تر مخه حالت ته د سمدستي ستنېدو غوښتنه وکړه.
فیدان په باکو کې د وینا پر مهال وویل چې مخ په زیاتېدونکي متقابل بریدونو د سولې هڅې سختې زیانمنې کړې دي او غوښتنه یې وکړه چې له ایران سره اړوندې شخړې باید د ډیپلوماسۍ له لارې حل شي.
هغه وویل چې د ایران امنیت او ثبات په مستقیم ډول پر تورکیې او اذربایجان اغېز کوي، او زیاته یې کړه چې انقره له ټولو اړوندو اړخونو سره په اړیکه کې ده ترڅو د بحران په حل کې مرسته وکړي.
سعودي عربستان وایي مکې مکرمې ته نږدې یې د حوثیانو یوه ډرون الوتکه نسکوره کړې.
د سعودي په مشرۍ ائتلاف ویلي چې د سعودي هوایي دفاع د یمن د حوثي ډلې له خوا توغول شوې یوه بې پیلوټه الوتکه (ډرون) د مسلمانانو د مقدسه ښار مکې مکرمې ته نږدې کشف او له منځه وړې ده.
د ائتلاف ویاند تركي المالكي وویل چې دا ډرون د منع شوې هوایي حریم ته له ننوتو وړاندې محاصره او نسکور شو، چې پاتې شونې یې د ښار په سویل کې لویدلي دي.
المالکي دا پر مکې مکرمې د حوثیانو دویمه احتمالي حمله وبلله او ویې ویل چې د حرمین شریفین او حاجیانو امنیت «سره کرښه» ده او د نورو بریدونو د مخنیوي لپاره د جدي اقداماتو خبرداری یې ورکړ.
ملګري ملتونه: د اسرائیلو بلډوزرونه په غزه کې ویجاړیو ته دوام ورکوي او د مړو درناوی نه کوي
د ملګرو ملتونو د بشري حقونو مشر فولکر تورک ویلي چې په غزه کې ډېری هغه سیمې چې اسرائیلي ځواکونه پهکې ځای پر ځای دي، د بلډوزرونو لخوا هوارېږي او تر خاورو لاندې د مړو هېڅ درناوی نه کېږي.
تورک وویل چې داسې ښکاري د بشپړو کورنیو پاتې شونې له خاورو راایستل کېږي، او خبرداری یې ورکړ چې دا موندنې ښايي یوازې خورا وړه برخه وي.
هغه د روانو حقوقي پروسو په ترڅ کې د سرغړونو د اسنادو او شواهدو پر ساتلو ټینګار وکړ او غوښتنه یې وکړه چې نړیوالو پلټونکو ته دې د غزې ټولو برخو ته د لاسرسي اجازه ورکړل شي.
په یمن کې جګړو تر سلو زرو ډېر کسان بې ځایه کړي دي: ملګري ملتونه
ملګرو ملتونو ویلي چې په یمن کې د دولتي ځواکونو او حوثیانو ترمنځ جګړو په هېواد کې دننه تر ۱۰۰,۰۰۰ ډېر کسان بې ځایه کړي او زرګونه نور یې بهر ته تېښتې ته اړ کړي دي.
دا بې ځایه کېدنه د حوثیانو د یوې اونۍ له بریدونو وروسته رامنځته شوې چې په ترڅ کې یې دغې ډلې د یمن د سرې بحیرې پاتې ساحل ونیوه او د باب المندب پر سټراټیژیک تنګي یې خپل کنټرول پیاوړی کړ.
د ملګرو ملتونو د کډوالو ادارې ویلي چې د یمن د لوېدیځ ساحل په اوږدو کې د تاوتریخوالي زیاتوالي له ۱۰۰,۰۰۰ ډېر کسان په کور دننه بې ځایه کړي او زرګونه نور یې مجبوره کړي چې په جيبوتي کې خوندیتوب ولټوي.
امریکا او سوریه پر دوه اړخیزو اړیکو او سیمه ییز امنیت خبرې کوي
د امریکا د بهرنیو چارو وزیر مارکو روبیو د سوریې د بهرنیو چارو له وزیر اسعد الشیباني سره په یوه ټېلېفوني اړیکه کې پر سیمه ییز امنیت او د نږدې همکاریو پر پراختیا خبرې وکړې.
روبیو د سوریې د لږکیو ډلو د دوامداره ادغم اهمیت ټینګار وکړ او له اټومي انرژۍ نړیوال اژانس سره یې د سوریې د پرمختګونو ستاینه وکړه.
د سوریې د بهرنیو چارو وزارت ویلي چې په دغې ټېلېفوني خبرو کې دوه اړخیزې اړیکې او د همکاریو د پیاوړتیا لارې چارې هم وڅېړل شوې، او الشیباني د بندیزونو د لرې کولو له امله له امریکا څخه د سوریې مننه څرګنده کړه.