مسکو په کابل کې د طالبانو په مشرۍ له چارواکو سره د اړیکو پراخولو ته دوام ورکوي.
روسیې او افغانستان په مسکو کې د امنیت د نړیوالې غونډې په ترڅ کې د پوځي-تخنیکي همکاریو یو هوکړه لیک لاسلیک کړ. دا په داسې حال کې ده چې مسکو په کابل کې د طالبانو تر مشرۍ لاندې ادارې سره د خپلو اړیکو پراختیا ته دوام ورکوي.
دا هوکړه لیک د چهارشنبې په ماښام د روسیې د ملي امنیت شورا منشي سرګي شویګو او د افغانستان د دفاع وزیر محمد یعقوب (مجاهد) ترمنځ لاسلیک شو.
یعقوب مجاهد وویل: «له روسیې سره تعامل زموږ لپاره مهم دی. افغانستان او روسیه اوږدمهاله تاریخي اړیکې لري او موږ غواړو په همدې لوري حرکت ته دوام ورکړو. موږ دوه اړخیزې اړیکې پراخې کړې دي.»
شویګو وویل چې لویدیځ هېوادونه باید د افغانستان منجمد شوې شتمنۍ ازادې کړي او په دغه هېواد کې د خپل ۲۰ کلن نظامي شتون وروسته د افغانستان د بیارغونې مسؤلیت پر غاړه واخلي.
هغه زیاته کړه: «موږ په دې باور یو چې لویدیځ هېوادونه باید د افغانستان بندې شوې شتمنۍ خلاصې کړي، په افغانستان کې د خپل ۲۰ کلن شتون په اړه خپل مسؤلیت په بشپړ ډول وپېژني او له جګړې وروسته د هېواد د بیارغونې بار په خپلو اوږو واخلي.»
دا هوکړه لیک د مسکو او طالب چارواکو ترمنځ د مخ په زیاتېدونکو اړیکو په لړ کې لاسلیک کېږي.
د روانې میاشتې په پیل کې، د قرغزستان په بشکیک کې د شانګهای د همکارۍ سازمان د امنیت شورا د منشيانو په غونډه کې شویګو ویلي وو چې روسیې له طالبانو سره خبرې اترې پیل کړي او له دغې ډلې سره د یو "بشپړ شراکت" د پراخولو په حال کې ده.
