د لبنان په سویل کې د یوې چاودنې له امله یو اسرائیلي سرتيری وژل شوی او اووه نور ټپیان شوي دي.
دا پېښه، چې د لیتاني سیند ته نږدې راپور شوې، په داسې حال کې رامنځته کېږي سره له دې چې د امریکا او ایران ترمنځ تړون کې لبنان هم شامل دی خو اسرائیل د لبنان او اسرائیلو د پولې په اوږدو کې خپلو بریدونو ته دوام ورکوي.
د اسرائیلو د عامه خپرونې KAN د پنجشنبې په سهار راپور ورکړ چې په جنوبي لبنان کې د پوځي قوماندې پوستې ته نږدې د چاودیدونکو توکو د چاودنې له امله یو اسرائیلي عسکر ووژل شو او اووه نور ټپیان شول.
د راپور له مخې، پېښه د چهارشنبې په ورځ د مازدیګر شاوخوا پنځه بجې هغه مهال رامنځته شوه، کله چې د ګیواټي لوا سرتیري د ۳۶مې فرقې د مرستیال قوماندان د مخکینۍ قوماندانۍ پوستې ته نږدې په پښو روان وو.
راپور د اسرائیلي پوځ له قوله ویلي چې هغه څه چې پوځ «د دښمن چاوديدونکی توکی» بللی، د لیتاني سیند ته نږدې د ځواکونو ترڅنګ وچاوديد او اووه سرتيري یې د چاودنې د ټوټو له امله ټپیان کړل. ټپیان د چورلکو په وسیله روغتونونو ته ولېږدول شول.
دا پیښه د لبنان او اسرائیلو د پولې په اوږدو کې د دوامداره تاوتریخوالي په مینځ کې رامینځته شوه سره له دې چې د واشنګټن او تهران ترمنځ د فبروري په ۲۸مه د ایران په وړاندې د اسرائیلو او امریکا د بریدونو وروسته د دښمنۍ پای ته رسولو لپاره وروستۍ تفاهم لاسلیک شو.
ایراني چارواکو په وار وار ویلي چې په سیمه ایزو جبهو کې د اسرائیلو د پوځي اقداماتو بندول، په ځانګړې توګه په لبنان کې، د چهارشنبې په ورځ د ایران او امریکا د ولسمشرانو لخوا لاسلیک شوي د تفاهم یادداشت له مهمو موخو څخه دی.
اسرائیل لا هم د سویلي لبنان ځینې سیمې اشغال کړې دي؛ ځینې یې له لسیزو راهیسې او ځینې نورې یې د دواړو خواوو ترمنځ د وروستۍ جګړې راهیسې تر خپل کنټرول لاندې ساتلي دي. د وروستي پوځي کمپاین په جریان کې، اسرائیلي ځواکونو د لبنان خاورې ته له لسو کیلومترو څخه ډیر پرمختګ وکړ.
د سیمه ییزو چارواکو په وینا، د مارچ له دوهمې نیټې راهیسې د اسرائیلو برید له ۳،۸۲۰ څخه ډیر خلک وژلي، له ۱۱،۸۵۰ څخه ډیر نور یې ټپیان کړي او له یو ملیون څخه ډیر خلک یې بې ځایه کړي دي.
