دا ارقام د دواړو هېوادونو د پېښو پر وړاندې د مبارزې چارواکو د پنجشنبې په ورځ اعلان کړل.
په افغانستان کې، چې لا دمخه له سخت بشري کړکېچ سره مخ دی، د مارچ له ۲۶مې راهیسې د بارانونو، سېلابونو، ځمکې ښوېدنې او تالندې (برېښنا) له امله ۱۴۸ کسانو ژوند د لاسه ورکړی دی. دا خبره د طبیعي پېښو پروړاندې د مبارزې ملي ادارې ویاند محمد یوسف حماد فرانس پریس (AFP) اژانس ته کړې ده.
د میدان وردګو ولایت د اطلاعاتو او کلتور ریاست په وینا، د دغه ولایت د جغتو ولسوالۍ په دیوالک کلي کې د یو دیوال د نړېدو له امله یو ماشوم ژوند د لاسه ورکړی دی. همداراز په مرکزي ولایت پروان کې، د دغه ولایت د پېښو پر وړاندې د مبارزې ادارې مشر مولوي عبدالعلیم افضلي وویل چې د چهارشنبې په ورځ د کورونو د چتونو د پرېوتو له امله شپږ کسان مړه شوي دي.
د پاکستان په شمال کې هم په وروستیو ورځو کې د مړو شمېر زیات شوی؛ د خیبر پښتونخوا ایالت د پېښو پر وړاندې د مبارزې ولایتي ادارې فرانس پریس ته ویلي چې د مارچ له ۲۵مې راهیسې هلته ۵۱ کسان مړه شوي دي. د پاکستان تر ادارې لاندې کشمیر کې هم د مارچ له ۲۵مې راهیسې ۵ کسانو ژوند له لاسه ورکړی دی.
د پاکستان په سویل لویدیځ بلوچستان ایالت کې بیا د ځايي چارواکو د وروستیو ارقامو له مخې، د مارچ له ۲۰مې راهیسې لږ تر لږه ۱۸ کسان مړه شوي دي.
دې سختې هوا پراخ زیانونه اړولي دي؛ یوازې په افغانستان کې تر ۳۷۰ کیلومتره ډېر سړکونه ویجاړ شوي او نږدې ۱۲۳۰ کورونه نړېدلي دي.
افغانستان ډېری وخت د خونړیو سېلابونو، ځمکې ښوېدنې او توپانونو شاهد وي، په ځانګړې توګه په لیرې پرتو سیمو کې چې بنسټیز تاسیسات یې کمزوري او د طبیعي پېښو پر وړاندې مقاومت نلري.
