انقرې د پاکستان په بلوچستان ایالت کې له  خونړۍ چاودنې وروسته وویل چې د سیمې سوله او ثبات په نښه کوونکي بریدونه د منلو وړ نه دي.

تورکیې د پاکستان په بلوچستان ایالت کې پر یوه مسافر وړونکي ریل ګاډي ترهګریز برید په کلکه غندلی او د ځاني زیانونو په اړه یې خپله ژوره خواشیني څرګنده کړې ده.

د تورکیې د بهرنیو چارو وزارت په خپره کړې اعلامیه کې ویلي چې دوی د په بلوچستان ایالت کې په یو مساپروړونکې ریل ګاډي  په برید کې د اوښتې مرګ ژوبلې له امله ډیر زیات خواشیني دي. په اعلامیه کې راغلي: "موږ دا ناوړه برید په کلکه غندو، وژل شویو ته د الله تعالی له درباره د رحمت غوښتنه کوو او د هغوی کورنیو او د پاکستان خلکو ته د تسلیت مراتب وړاندې کوو."

دغه وزارت ټینګار وکړ چې د سیمې سوله او ثبات په نښه کوونکي دا ډول بریدونه په هیڅ ډول د منلو وړ نه دي او د ترهګرۍ پر وړاندې مبارزه کې یې د تورکیې او پاکستان ترمنځ پر پیوستون او یووالي بیا ټینګار وکړ.

د یکشنبې په ورځ د پاکستان په بلوچستان ایالت کې د اورګاډي پر پټلۍ په یوه چاودنه کې شاوخوا ۲۸ تنه ووژل شول او ۹۰ نور ټپیان شول. پولیسو ویلي، چاودنه هغه مهال شوې چې ریل ګاډی د کویټې ښار د چاوڼۍ سیمې په لور روان و.

بلوچستان، چې په کانونو بډایه سیمه ده او د چین-پاکستان د څو میلیارده ډالرو په ارزښت د اقتصادي دهلېز (CPEC) لپاره یوه مهمه لاره ده، له ډېرې مودې راهیسې له ترهګرۍ سره مخ دی.

د بلوچستان ازادي غوښتونکی پوځ ، چې پر ملکي وګړو، امنیتي ځواکونو او حیاتي زیربناوو د ډېرو ترهګریزو بریدونو مسؤل ګڼل کېږي، په تېر کې یې د پاکستان د بې ثباته کولو هڅې کړې دي. تېر کال امریکا دغه ډله  د یوې بهرنۍ ترهګرې ډلې په توګه اعلان کړه.

اسلام اباد هم ادعا کوي چې دا ډله  د ګاونډي هېواد هند له خوا ملاتړ ترلاسه کوي، خو نوي ډیلي تل دا تورونه رد کړي دي.