اوس د دوه میاشتنیو مذاکراتو موده پیل شوه چې ورسره د هرمز تنګي پرانیستل کېدو او د ایران د اټومي پروګرام په اړه د احتمالي پرمختګ په لور د نړۍ سترګې اوښتې دي.
د امریکا ولسمشر ډونالډ ټرمپ د ایران سره پر خپلې هوکړې د نیوکه کونکو پر وړاندې توند غبرګون ښودلی او هغو کسانو ته یې چې پر ده یې د جګړې د پای ته رسولو لپاره د امتیازاتو ورکولو تور پورې کړی، "ناپوهان" (fools) وویل. دا پداسې حال کې ده چې په سویس کې د معاملې د پلي کېدو په اړه د تخنیکي خبرو اترو لړۍ پیلېدونکې ده.
په یو ناڅاپي پرمختګ کې، وروسته له هغه چې د هوکړې د رسمي لاسلیک په اړه ابهام موجود و، ټرمپ د چهارشنبې په شپه د پاریس بهر د "ورسای" په تاریخي ماڼۍ کې له فرانسوي ولسمشر ایمانویل میکرون سره د شمعو په رڼا کې د ډوډۍ پر مهال دا هوکړه لاسلیک کړه.
ایمانویل میکرون، چې د ورسای ماڼۍ (چې پکې د لومړۍ نړیوالې جګړې د پای تړون هم لاسلیک شوی و) کوربه و، د ټرمپ د لاسلیک پر مهال د "آفرین" (Bravo) چغه کړه.
ټرمپ د هوکړې له لاسلیک څو ساعته وروسته، د پنجشنبې په ورځ پر ټولنیزو رسنیو ولیکل: "دا ناپوهان، چې فکر کوي زه د ایران په وړاندې پوره سخت نه وم، پداسې حال کې چې د ونډو بازار اوج ته رسیدلی او د تېلو بیې په چټکۍ راکمې شوې دي، یا حسود دي، یا بد خلک دي او یا هم احمقان دي."
د ټرمپ او د هغه د ایراني سیال لخوا د منځني ختیځ د جګړې د پای ته رسولو لپاره د تړون له لاسلیک وروسته د تېلو نړیوالې بیې راټیټې شوې. د دغه تړون له مخې به د هرمز تنګی پرانیستل کیږي، خو لاهم د جزیاتو په اړه دوه میاشتني مذاکرات په مخکې دي.
د پاکستان لومړي وزیر شهباز شریف، چې د دې هوکړې په منځګړیتوب کې یې مرسته کړې، وویل چې دا تړون به "سمدستي نافذ" شي او ایران به "سمدلاسه د هرمز تنګی پرانیزي." هغه هم دا تړون لاسلیک کړی دی.
میکرون د دغه تړون ستاینه وکړه او ویې ویل چې دا "سولې ته لاره هواروي، د هرمز تنګی بې له کوم محصول (ټول) څخه پرانیزي او د اټومي، بالستیک او سیمه ییزو فعالیتونو په اړه د وروستي تړون لپاره ۶۰ ورځې وخت ورکوي."
که څه هم د راتلونکو ګامونو په اړه یو څه ګډوډي موجوده وه، ځکه په پیل کې ټاکل شوې وه چې دا تړون د جمعې په ورځ په سویس کې د ایران د پارلمان د رئیس محمد باقر قالیباف او د امریکا د مرستیال ولسمشر جې ډي وانس لخوا لاسلیک شي. د ایران د بهرنیو چارو وزارت ویاند اسماعیل بقايي ویلي چې اوس نو حضوري مراسمو ته اړتیا نشته، خو شهباز شریف وویل چې په سویس کې به رسمي مراسم او تخنیکي خبرې ترسره شي.
د تړون د متن له مخې، واشنګټن ژمنه کوي چې سمدلاسه به د تېلو هغه بندیزونه لرې کړي چې د ایران اقتصاد یې ځپلی دی.
د جګړې د پای ته رسولو لپاره د ټرمپ پریکړه، چې پکې ۱۳ امریکايي سرتیري ووژل شول او د امریکا د مهماتو لویه برخه وکارول شوه، د هغه ځینې کورني متحدین اندیښمن کړي دي. د جمهوري غوښتونکي ګوند سناتور بیل کاسیډي دا د "وروستیو لسیزو ترټولو لویه بهرنۍ ډیپلوماټیکه تېروتنه" وبلله. هغه وویل: "د ایران اټومي هیلې نه دي مهار شوي او هغوی زده کړل چې د هرمز تنګي ګواښل کار ورکوي."
فوکس نیوز هم د منتقدینو له قوله ویلي چې دې تړون ایران ته "لوی مالي ګټې" ورکړې پرته له دې چې د خپل اټومي پروګرام د لغوه کولو غوښتنه ترې وشي.
