د امریکا د مشر دا څرګندونې په داسې حال کې مخې ته راځي چې پاکستان په دې اونۍ کې د نویو خبرو اترو لپاره تیاری نیسي، خو د ایران ګډون لا هم ناڅرګند دی او د ۱۴ ورځو اوربند موده د چهارشنبې په ورځ پای ته رسیږي.
د امریکا ولسمشر ډونالډ ټرمپ ویلي چې ایران دوه اونۍ وړاندې شوی اوربند "څو ځله" نقض کړی دی؛ دا په داسې حال کې ده چې تمه کیږي دواړه لوري په روانه اونۍ کې په پاکستان کې د خبرو اترو دویم پړاو ترسره کړي.
ټرمپ د سه شنبې په ورځ پخپلې ټولنیزې شبکې 'ټروت سوشل' (Truth Social) کې ولیکل: "ایران په وار وار اوربند تر پښو لاندې کړی دی!"
په سیمه کې دښمني او کړکېچ هغه مهال زیات شو کله چې امریکا او اسرائیل د فبرورۍ پر ۲۸مه پر ایران ګډ بریدونه پیل کړل. په غبرګون کې، تهران پر اسرائیل او د سیمې پر هغو هیوادونو بریدونه وکړل چې امریکایي تاسیسات پکې ځای پر ځای دي.
پاکستان د اپریل پر ۱۱مه او ۱۲مه د سولې د خبرو اترو د لومړي پړاو کوربه توب وکړ. دا وروسته له هغه چې د اپریل پر ۸مه د ۱۴ ورځني اوربند منځګړیتوب وشو، چې دغه موده د چهارشنبې په ورځ پای ته رسیږي.
ټرمپ مخکې ویلي وو چې دا "خورا لیرې" ده چې هغه به اوربند وغځوي.
اوسمهال په اسلام اباد کې د خبرو اترو د دویم پړاو لپاره چمتووالی روان دی، خو د ایراني لوري ګډون لا هم بې باوره ښکاري. د امریکایي پلاوي مشري به یو ځل بیا د ولسمشر مرستیال جې ډي وانس کوي.
