د امریکا په کانګرس کې ۳۰ دیموکراتو استازو د اسرائیل د اټومي وړتیا په اړه د پټوالي د پردې لرې کولو لپاره اقدام کړی دی. د بهرنیو چارو وزیر مارکو روبیو ته په یوه لیک کې، د "دوه ګونو معیارونو پای ته رسولو" او په سیمه کې د اټومي خطرونو په اړه د روڼتیا غوښتنه شوې ده.
د خواکین کاسټرو په مشرۍ دې ډلې ویلي، چې په منځني ختیځ کې د مخ پر زیاتېدونکي کړکېچ او له ایران سره د روانې جګړې په شرایطو کې، دوی د امریکا د بهرنیو چارو له وزارت څخه د لاندې پوښتنو لپاره روښانه او کره ځوابونه غواړي.
وړتیا او زېرمه
د اټومي وسلو وړتیا: د اسرائیل د اټومي وسلو د وړتیا بشپړ کچه څومره ده؟
د سیسټمونو جزئیات: د اسرائیل د ټولو اټومي وسلو سیسټمونو، د جنګي سرګلولو او توغولو سیسټمونو په ګډون، تخنیکي تفصیلات څه دي؟
تولید او د اومه توکو سرچینې
د غني کولو وړتیا: ایا اسرائیل دا مهال د یورانیمو د غني کولو وړتیا لري او دغه وړتیا په کومه کچه ده؟
ډیمونا او فیسایل توکي: ایا په ډیمونا کې د نیګیو اټومي څېړنیز مرکز فیسایل توکي (fissile material) تولیدوي؟ که ځواب هو وي، د تولید اټکل شوې اندازه او د دې توکو د کارونې ځایونه څه دي؟
د پلوتونیم تولید: ایا په همدې مرکز کې پلوتونیم تولیدېږي؟ که هو، د تولید اندازه او د کارونې موخه یې څه ده؟
ستراتیژیکه عقیده او له امریکا سره اړیکې
د سرې کرښې اعلان: ایا اسرائیل له ایران سره د اوسنۍ جګړې په شرایطو کې د اټومي وسلو د کارولو په اړه کومه اټومي عقیده، سره کرښه یا کوم ځانګړی حد په رسمي ډول د امریکا چارواکو ته اعلان کړی دی؟
د نه کارولو ډاډ: ایا د امریکا حکومت تر دې دمه له اسرائیل څخه د اټومي وسلو د نه کارولو په اړه کوم رسمي ډاډ ترلاسه کړی دی؟
استخباراتي نښې: ایا د ایران سره د اوسنۍ جګړې یا پخوانیو کړکېچونو پر مهال داسې کوم معلومات ترلاسه شوي چې اسرائیل د اټومي وسلو د کارولو یا ځای پر ځای کولو پلان درلود؟
امنیت او بېړنۍ سناریوګانې
د راډیو اکټیف خطر تحلیل: پر نیګیو (ډیمونا) یا نورو اټومي تاسیساتو د احتمالي برید په صورت کې، په سیمه کې د امریکایي وګړو او پوځي پرسونل لپاره د راډیو اکټیف زیانونو د خطر په اړه د واشنګټن ارزونه څه ده؟
د پوځي ناکامۍ سناریوګانې: ایا د امریکا حکومت دا تحلیل کړې دي چې کوم سخت شرایط، لکه پر ډیمونا د ایران برید یا د اسرائیل احتمالي پوځي ناکامي، کولی شي اسرائیل دې ته اړ کړي چې پر اټومي انتخاب غور وکړي؟ د دې ډول سناریوګانو لپاره کوم ډول بېړني پلانونه چمتو شوي دي
