د اسرائیلو دولتي تلویزیون "کان" په یوه راپور کې هغه انځور تایید کړی چې پکې یو اسرائیلي پوځي د لبنان په سوېل کې د "دبل" په نوم عیسوي کلي کې د بي بي مریم د مجسمې په خوله کې سګرټ ږدي.
په هغه انځور کې، چې د دبل په کلي کې اخیستل شوی، لیدل کیږي چې یو پوځی د مجسمې په خوله کې سګرټ ځای پر ځای کوي، په داسې حال کې چې نور پوځیان یې عکسونه اخلي او په ټولنیزو رسنیو کې یې خپروي.
راپور زیاتوي چې د اسرائیلو لوی درستیز ایال ضمیر د عیسویانو د مذهبي سمبولونو په اړه د پوځیانو دا کړنه "یو نامناسب چلند او د پوځ له ارزښتونو څخه سرغړونه" بللې ده.
همدارنګه ویل شوي چې د اسرائیلو پوځ په دې اړه په یوې اعلامیې کې ویلي چې "پېښه تر څېړنې لاندې ده او د موندنو په رڼا کې به لازم اقدامات وشي."
د حضرت عیسی (ع) مجسمې ته سپکاوي هم غبرګونونه راپارولي وو
د اپرېل په ۱۹مه، د اسرائیلو د پوځ یوه سرتېري د لبنان په سوېل کې له اشغال شویو ښارګوټو څخه په "دیر سریان" کې د حضرت عیسی (ع) مجسمه په پتک (لوی څټک) ټوټې ټوټې کړې وه.
د اسرائیلو پوځ منلې وه چې د پېښې اړوند انځور رښتینی دی او د پېښې په اړه یې د پلټنو د پیل اعلان کړی و.
د مذهبي سمبول په وړاندې د اسرائیلي پوځي دغه چلند په عیسوي نړۍ کې سخت غبرګونونه راپارولي وو.
د دې پېښې په غبرګون کې، د اسرائیلو لومړي وزیر بنیامین نتنیاهو بښنه غوښتې وه او اعلان شوی و چې هغه دوه سرتېري چې مجسمه یې ویجاړه کړې او عکسونه یې اخیستي وو، له محاربوي دندو لیرې شوي او د ۳۰ ورځو پوځي بند سزا ورکړل شوې ده.
د حضرت عیسی (ع) مجسمې ته د سپکاوي له غبرګونونو وروسته، د اسرائیلو د بهرنیو چارو وزیر ګیډون سار، ډیپلومات جورج ډیک د عیسوي نړۍ لپاره د ځانګړي استازي په توګه ټاکلی و.
