د تورکیې دفاعي ستر شرکتونه، په شمول د بایکار (Baykar)، اسلسان (Aselsan) او روکټسان (Roketsan)، به په دې نندارتون کې خپلې نوې ټیکنالوژۍ نندارې ته وړاندې کړي.
د تورکیې د «SAHA 2026» دفاعي، هوايي او فضايي نړیوال نندارتون د سه شنبې په ورځ په استانبول کې د نندارچیانو پر مخ پرانیستل شو. په دې نندارتون کې د نړۍ له ۱۲۰ څخه د زیاتو هیوادونو ۱۷۰۰ شرکتونه (چې ۲۶۳ یې نړیوال دي) او تر ۳۰۰۰۰ ډېر مسلکي کسان ګډون لري.
دا نندارتون د ساحا استانبول «SAHA Istanbul» لخوا تنظیم شوی، چې په تورکیه او اروپا کې د دفاعي، هوايي او فضايي صنعت ترټولو لویه ټولګه ده. دغه نندارتون به د می تر ۹مې پورې د استانبول د نندارتونونو په مرکز (Istanbul Expo Centre) کې دوام ولري.
دا نندارتون په ټولیزه توګه په ۴۰۰ زره متره مربع ساحه کې ترسره کیږي، چې تر اوسه پورې د دې لړۍ ترټولو لوی نندارتون بلل کیږي.
په ساحا ۲۰۲۶ SAHA 2026 نندارتون کې به ۲۰۳ نوي محصولات معرفي شي او د ۱۶۴ هوکړه لیکونو د لاسلیک مراسم به ترسره شي. د دې پیښې هدف دا دی چې د صادراتو د تړونونو ارزښت چې په ۲۰۲۴ کال کې ۶.۲ میلیارده ډالر و، سږکال لږ تر لږه ۸ میلیارده ډالرو ته لوړ کړي.
په دې نندارتون کې د اروپا، امریکا او کاناډا د شرکتونو ګډون د پام وړ دی، او د نړۍ له څلورو وچو څخه رسمي پلاوي او سوداګریز ټیمونه ورته راغلي دي. د نندارتون د یوې برخې په توګه، د هیواد دننه جوړې شوې بې پیلوټه سمندري کښتۍ هم په «اتاکوی مارینا» کې نندارې ته ایښودل شوې دي.
د تورکیې دفاعي شرکتونه نوې ټیکنالوژۍ معرفي کوي
د ډرون الوتکو مشهور شرکت «بایکار» به «مېزراک» (MIZRAK) نومې هوښیار مهمات نندارې ته وړاندې کړي، چې له ۱۰۰۰ کیلومتره څخه زیات واټن وهي او په مصنوعي ځیرکتیا سمبال دي. همدارنګه د بایکار K2 کامیکاز ډرون او «سویري سینیک» (Sivrisinek) مهمات به هم د لومړي ځل لپاره وښودل شي.
بل دفاعي ستر شرکت «اسلسان» به ۵ نوي محصولات او د پخوانیو محصولاتو ۶ پرمختللې بڼې نندارې ته وړاندې کړي.
د روکټسان او FNSS لخوا په ګډه جوړه شوې «لیزري وسله» (Directed Energy Weapon System) چې په پراخه کچه پیژندل شوې، هم په دې نندارتون کې له اضافي وړتیاوو سره نندارې ته وړاندې کیږي.
همدارنګه د STM شرکت به د عصري جګړې لپاره نوي هوايي او سمندري سیسټمونه معرفي کړي.
دا نندارتون به د می په ۹مه د «عامې ورځې» په مناسبت د ټولو خلکو پر مخ پرانیستی وي.
