د امریکا ولسمشر ډونالډ ټرمپ ویلي چې له ایران سره اوربند په یو ډیر نازک حالت کې قرار لري. هغه زیاته کړه چې په جګړه کې د "بشپړې بریا" په لټه کې دی او د هرمز تنګي له لارې د کښتیو د سمندري بدرګې پر بیا پیلولو غور کوي.
د امریکا پر اقتصاد د جګړې د اغېزو له امله د کورنیو فشارونو په منځ کې، ټرمپ د دوشنبې په ورځ وویل چې د واشنګټن د غوښتنو په وړاندې د اونۍ په پای کې د ایران غبرګون دغه کمزوری اوربند اوس "بې حده ضعیف" کړی دی. هغه په سپینه ماڼۍ کې خبریالانو ته وویل: "زه به ووایم چې دا اوس یو له خورا کمزورو حالتونو څخه دی؛ دا اوربند یو نازک حالت پورې تړلی دی."
هغه په یو تمثیلي ډول خبریالانو ته وویل: "زه به ووایم چې اوربند په سخت نازک حالت کې دی، داسې لکه یو ډاکټر چې راننوځي او وايي: 'ښاغلیه، ستاسو د عزیز د ژوندي پاتې کېدو چانس یوازې یو سلنه دی'."
بل لور ته، ټرمپ له فاکس نیوز سره په خبرو کې وویل چې هغه د هرمز له لارې د تېلو او سوداګریزو کښتیو د بدرګې لپاره د امریکا د هڅو پر نوي کولو غور کوي، خو لا یې وروستۍ پرېکړه نه ده کړې. دغه نوښت چې د امریکا لخوا ورته د "آزادۍ عملیات" نوم ورکړل شوی و، لومړی د مۍ په ۶مه پیل شو خو له دوو ورځو لږ وخت کې بېرته لغوه شو.
امریکا ایران ته د شخړې د کمولو لپاره یو لړ شرایط لېږلي وو، چې ډېری یې د دغه هېواد د اټومي پروګرام د پراختیا د مخنیوي په اړه وو. د اونۍ په پای کې ایران خپل ځوابي وړاندیزونه ولېږل، چې ټرمپ د دوشنبې په ورځ خبریالانو ته هغه "کثافات" (بې ګټې) وبلل.
ټرمپ وویل چې دا بندون د دې مانا نه لري چې متحده ایالات به شاتګ وکړي. هغه وویل: "موږ به بشپړه بریا ترلاسه کړو. ایران فکر کوي چې زه به له دې حالته ستړی شم، یا به زړه توری شم، او یا به تر فشار لاندې راشم. خو دلته هیڅ فشار نشته."
کله چې ترې وپوښتل شول چې ایا لا هم له ایران سره خبرو ته چمتو دی، ټرمپ وویل چې هلته رهبري په "مصلحت غوښتونکو" او "لیونیانو" وېشل شوې ده. هغه زیاته کړه: "لیونیان غواړي تر پایه وجنګېږي. خو پوهېږئ، دا به یوه ډېره چټکه او لنډه جګړه وي."
