وال سټریټ ژورنال وايي، اسرائیلو د امریکا په خبرتیا د عراق په دښتي سیمه کې یوه پټه پوځي اډه جوړه کړې او پر هغو عراقي سرتېرو یې هوايي بریدونه کړي چې د دې ځای موندلو ته نږدې شوي وو.
وال سټریټ ژورنال راپور ورکړی چې اسرائیلو د ایران پر وړاندې د هوايي بریدونو د ملاتړ لپاره د عراق په دښتي سیمه کې یوه پټه پوځي اډه جوړه کړې ده.
اسرائیلي ځواکونو د جګړې په لومړیو کې پر هغو عراقي سرتېرو هوايي بریدونه کړي چې د دې ځای موندلو ته نږدې شوي وو.
د ورځپاڼې په وینا، دا پوسته له جګړې لږ مخکې د امریکا په خبرتیا، خو د عراق د حکومت له خبرتیا او اجازې پرته جوړه شوې وه.
دا اډه د مارچ په لومړیو کې وروسته له هغه تقریباً افشا شوه، چې عراقي دولتي رسنیو راپور ورکړ چې یوه شپون مشکوک پوځي فعالیتونه لیدلي، چې له امله یې عراقي سرتېري پلټنو ته وهڅول شول.
اسرائیلو د دې لپاره چې عراقي ځواکونه دې ځای ته له رسېدو منع کړي، په هوايي بریدونو ځواب ورکړ، هغه برید چې د یوه عراقي سرتېري له وژل کېدو وروسته د عراق حکومت وغانده.
د عراق د ګډو عملیاتو د قوماندانۍ مرستیال، قیس المحمداوي، دولتي رسنیو ته وویل: "دا بې پروا عملیات له همغږۍ او اجازې پرته ترسره شوي دي."
اسرائیلي ځواکونو دا پوسته د اسرائیلو د هوايي ځواک لپاره د لوژستیکي مرکز په توګه کارولې، په داسې حال کې چې د راپورونو له مخې د لټون او ژغورنې ټیمونه هم هلته ځای پر ځای شوي وو.
د اسرائیلو پوځ د دې راپور په اړه له تبصرې کولو ډډه وکړه.
د فبرورۍ له ۲۸مې راهیسې سیمه ییز کړکېچونه په چټکۍ سره زیات شوي، چې د ایران ځوابي غبرګون او د هرمز تنګي د تړل کېدو لامل شوي دي.
د اپرېل په اتمه د پاکستان په منځګړیتوب یو اوربند نافذ شو، که څه هم وروسته ډونالډ ټرمپ د کومې ټاکلې نېټې له مشخص کولو پرته د دې اوربند د غځولو اعلان وکړ.
