په دې سمندري لاره باندې د ایران ولکې نړیوال بازارونه لړزولي او تهران ته یې د فشار یو مهم وسیله په لاس ورکړې ده؛ بلخوا متحده ایالاتو د ایران پر بندرونو خپله سمندري محاصره لګولې ده.
د ایران د ملي امنیت عالي شورا د دوشنبې په ورځ د هرمز تنګي د مدیریت لپاره د یوې نوې ادارې د جوړېدو اعلان وکړ. تهران دغه تنګی په عملي ډول تړلی او غواړي له هغو کښتیو څخه محصول (ټکس) واخلي چې له دې لارې تېرېږي.
یادې شورا په خپله رسمي اکس (پخواني ټویټر) پاڼه کې د «فارس خلیج د تنګي ادارې» (PGSA) په اړه یو پوسټ شریک کړی او ویلي یې دي چې دا اداره به د هرمز تنګي د عملیاتو او وروستیو پرمختګونو په اړه په ژوندۍ بڼه معلومات وړاندې کوي. د سپاه پاسداران د سمندري ځواکونو پاڼې هم ورته پوسټ شریک کړی دی.
لا تر اوسه په بشپړ ډول څرګنده نه ده چې دا نوې اداره به څه کارونه ترسره کوي، خو د روانې میاشتې په پیل کې د ایران «پریس ټي وي» خبري چینل ویلي و چې دا په اصل کې پر هرمز تنګي باندې د «حاکمیت د تمرین کولو یو سیسټم» دی او هغه کښتیۍ چې له تنګي تېرېږي، ورته به د یو ځانګړي ایمیل له لارې مقررات او قوانین لېږل کېږي.
ایران د فبروري په ۲۸مه له امریکا او اسراییلو سره د جګړې له پیل راهیسې د دې حیاتي لارې له لارې تګ راتګ تر ډېره بند کړی دی. د اپریل له ۸مې راهیسې یو نازک اوربند په لاره دی، خو پر دې لارې د ایران ولکې نړیوال بازارونه اندېښمن کړي او تهران ته یې د پام وړ امتیاز ورکړی دی.
د سولې او عادي حالت پر مهال، د نړۍ د تېلو او مایع طبیعي ګازو (LNG) شاوخوا پنځمه برخه او د سرې په څېر نور مهم توکي له همدې لارې لېږدول کېږي.
د جګړې له پیل راهیسې، ایران په وار وار ویلي چې په دغه تنګي کې سمندري تګ راتګ به بېرته «د جګړې څخه مخکې حالت» ته ستون نشي. تېره میاشت تهران ویلي و چې له دې لارې څخه یې د لومړي ځل لپاره د کښتیو د تېرېدو له درکه عواید ترلاسه کړي دي.
د شنبې په ورځ د ایران د پارلمان د ملي امنیت د کمیسیون مشر ابراهیم عزیزي وویل چې ایران د دغه تنګي د تګ راتګ د مدیریت لپاره یو «مسلکي میکانیزم» چمتو کړی چې ډېر ژر به ورڅخه مخکتنه وشي.
