د یوه چارواکي په وینا، چاودنه د خیبر پښتونخوا ایالت د لکی مروت ولسوالۍ په سرای نورنګ ښارګوټي کې رامنځته شوه.
د سیمه ییزې ادارې یوه چارواکي د تیلیفون له لارې انادولو ته ویلي چې د خیبر پښتونخوا ایالت د شمال لویدیځ په یوه بازار کې چاودنې لږترلږه نهه کسان ووژل او له ۲۰ څخه زیات نور یې ټپیان کړل.
چارواکي د نوم نه ښودلو په شرط وویل چې چاودنه د سې شنبې په ورځ د لکی مروت ولسوالۍ په سرای نورنګ ښار کې رامنځته شوه.
هغه زیاته کړه: "اوس مهال زه په روغتون کې یم، تر اوسه ۹ مړي راوړل شوي دي. لږ تر لږه ۲۲ ټپیان هم تر درملنې لاندې دي."
چارواکي وویل چې د مړو په منځ کې دوه پولیس هم شامل دي، او زیاته یې کړه چې چارواکو تر اوسه د چاودنې نوعیت نه دی تایید کړی.
تر اوسه کومې ډلې د برید مسؤلیت نه دی منلی.
امنیتي ځواکونو سیمه کلابنده کړې او د پېښې پلټنې یې پیل کړې دي، په داسې حال کې چې د ژغورنې ډلې ټپیان نږدې روغتونونو ته لېږدوي.
د پاکستان په شمال لوېدیځو سیمو کې په وروستیو کلونو کې د بریدونو کچه لوړه شوې، چې ډېری وختونه پکې امنیتي ځواکونه او ملکي وګړي په نښه کيږي.
د تحریک طالبان پاکستان (TTP) په نوم وسله واله ډله، چې اسلام اباد وایي په ګاونډي افغانستان کې خوندي پټنځایونه لري، په تیرو وختونو کې د ورته بریدونو مسؤلیت په غاړه اخیستی دی. خو کابل بیا وایي چې دغه ډله په افغان خاوره کې شتون نه لري.
