د پاکستان لومړي وزیر شهباز شریف ویلي چې دواړه لوري تر بل هر وخت د سولې یوې هوکړې ته نږدې شوي دي، او د هغې د برېښنایي لاسلیک او راتلونکې اونۍ د تخنیکي خبرو لپاره چمتووالی روان دی.

د خبرو اترو مهم منځګړي پاکستان ویلي چې امریکا او ایران کولای شي تر "۲۴ ساعتونو پورې" د جګړې د پای ته رسولو یوې هوکړې ته ورسېږي، خو بلخوا ایران وایي چې د یکشنبې په ورځ له امریکا سره د تفاهم لیک د لاسلیکېدو تمه نشته، مګر په راتلونکو ورځو کې یې د "اسلام اباد تفاهم لیک" د لاسلیک کېدو احتمال نه شي رد کېدای.

د پاکستان لومړي وزیر شهباز شریف، چې هېواد یې د سولې په خبرو کې مهم رول لوبولی، د شنبې په ورځ پر خپله ایکس (پخواني ټویټر) پاڼه ولیکل: "موږ تر بل هر وخت د سولې یوې هوکړې ته نږدې شوي یو."

هغه زیاته کړه: "د دې احتمال شته چې هوکړه په راتلونکو ۲۴ ساعتونو کې وروستۍ شي، پاکستان سمدلاسه وروسته د سولې د هوکړې د برېښنایي لاسلیک لپاره چمتووالی نیسي او ورپسې به راتلونکې اونۍ په تخنیکي کچه خبرې وشي."

د ایران د بهرنیو چارو وزارت ویاند، اسماعیل بقایي ویلي چې د یکشنبې په ورځ له امریکا سره د تفاهم لیک د لاسلیکېدو تمه نشته، خو یادونه یې وکړه چې په راتلونکو ورځو کې د اسلام اباد د تفاهم لیک د لاسلیک کېدو احتمال له پامه نه شي غورځول کېدای. بقایي ټینګار وکړ چې تهران باید د لاسلیک د ځانګړې نېټې په اړه په تبصره کې محتاط وي، د بل لوري شک او زړه نازړه توب ته یې اشاره وکړه او ویې ویل چې په خبرو اترو کې پرمختګونه تل د بدلون وړ دي.

د ایران د بهرنیو چارو وزیر عباس عراقچي د جمعې په ورځ په یوه ټولنیزه رسنۍ کې لیکلي وو: "د اسلام اباد تفاهم لیک هیڅکله تر دې کچې نږدې شوی نه و." دا د پاکستان پلازمېنې ته اشاره وه چې تر دې وړاندې یې د خبرو اترو کوربه توب کړی و.

خو دواړو لورو د هوکړې د محتوا په اړه په بشپړ ډول ضد او نقیض معلومات خپاره کړي دي، ځکه چې دواړه غواړي وښيي چې له دې جګړې څخه د برلاسي اړخ په توګه راوتلي دي. تهران د یورانیمو د غني کولو او د هرمز تنګي د کنټرول پر حق ټینګار کړی، چې دا د واشنګټن له پخوانیو سرو کرښو سره په ښکاره ټکر کې ښکاري.

د شنبې په ورځ په یاده تنګي کې نوې نښتې هم وشوې، امریکا وایي چې څو ایراني بې پیلوټه الوتکې یې نسکورې کړې چې سوداګریزې بېړۍ یې په نښه کولې. د امریکا مرکزي قوماندانۍ (CENTCOM) پر ایکس پاڼه لیکلي چې ایران "پر سوداګریزو بېړیو د برید په نیت څو یو طرفه بریدګرې بې پیلوټه الوتکې توغولې وې." هغوی زیاته کړې: "امریکايي ځواکونو په تېرو څو ساعتونو کې دا ټولې نسکورې کړې دي او په تنګي کې د بېړیو تګ راتګ بې له کوم خنډه دوام لري."

د امریکا ولسمشر ډونالډ ټرمپ د جمعې په ورځ دا خبره رد کړه چې ګواکې د سولې دا هوکړه د ایران په ګټه ده. ټرمپ په خپله 'ټروت سوشل' (Truth Social) شبکه کې ولیکل: "هغه شرایط چې ایران 'جعلي خبرونو' ته په لاس ورکړي، له هغو شرایطو سره هیڅ تړاو نه لري چې په لیکلي ډول پرې هوکړه شوې ده."

عراقچي د احتیاط غوښتنه وکړه او ایراني دولتي رسنیو ته یې وویل تر هغه چې په ټولو مسایلو بشپړه هوکړه نه وي شوې، "دا په پرېکنده ډول نه شي ویل کېدای چې یو تفاهم ته رسېدلي یو." هغه د هوکړې په اړه ځینې جزییات ورکړل او ویې ویل چې پدې کې د امریکا د سمندري کلابندۍ ختمول او د تنګي په اداره کې ځینې ناڅرګند بدلونونه شامل دي.

هغه دا هم وویل چې د ایران د غني شویو یورانیمو د مسئلې د هواري یوازنۍ لار "په ایران کې دننه د هغو رقیق کول دي." واشنګټن تور پورې کوي چې دا یورانیم د اټومي وسلو د پروګرام برخه ده.

د بهرنیو چارو وزیر زیاته کړه چې هر ډول هوکړه به "له لرې" (برېښنایي بڼه) لاسلیک شي، که څه هم سویس د جمعې په ورځ وړاندیز کړی و چې دا هوکړه دې هلته لاسلیک شي.

د پاکستان د بهرنیو چارو وزیر اسحاق ډار د شنبې په ورځ په یوه بیان کې وویل چې هغه د سولې د بهیر په اړه له خپل سویسي سیال سره خبرې کړې دي. عراقچي د جمعې په ورځ ویلي وو چې هوکړه ښایي "په راتلونکو ورځو کې" لاسلیک شي، په داسې حال کې چې یوه جګپوړي امریکايي چارواکي هم هیله څرګنده کړې چې دا هوکړه به په "راتلونکو څو ورځو کې" نهایي شي.