د امریکا د رسنیو د راپورونو له مخې، امریکا او ایران د وضعیت د نور خرابېدو د مخنیوي لپاره د ۴۵ ورځني اوربند په اړه په خبرو بوخت دي. منځګړي هڅه کوي د هرمز تنګي د پرانیستلو او د ایران د یورانیمو د زېرمو په اړه موضوعات حل کړي.

د "اکسوس" (Axios) خبري ویبپاڼې د راپور له مخې، امریکا، ایران او د سیمه ییزو منځګړو یوې ډلې د یوه احتمالي ۴۵ ورځني اوربند پر شرایطو خبرې کړي چې کېدای شي په پای کې د جګړې د دایمي پای ته رسېدو لامل شي.

که څه هم په راپور کې ویل شوي چې په راتلونکو ۴۸ ساعتونو کې د یوې نسبي هوکړې چانس کم دی، خو دا هڅه د کړکېچ د خورا سختېدو د مخنیوي یوازینۍ لاره بلل کېږي. که دا هڅه ناکامه شي، نو په دې کې به د ایران پر ملکي زیربناوو پراخ بریدونه او د خلیج په هېوادونو کې د انرژۍ او اوبو پر تاسیساتو ځوابي بریدونه شامل وي.

تر دې وړاندې، ولسمشر ټرمپ خپل ورکړل شوی مهلت ۲۰ ساعته نور هم وغځاوه او نوی وخت یې د سه شنبې ماښام ۸ بجې (د امریکا په وخت) وټاکه. ټرمپ اکسوس ته ویلي چې امریکا په "ژورو مذاکراتو" بوخته ده او د هوکړې امکان شته. هغه وویل: "ښه چانس شته، خو که دوی هوکړه ونه کړه، زه به هلته هر څه والوزوم."

دوه پړاویزه طرحه

ویل کېږي چې دا مذاکرات د پاکستاني، مصري او تورکي منځګړو له لارې او همدارنګه د امریکا د استازي سټیو ویټکوف او د ایران د بهرنیو چارو وزیر عباس عراقچي ترمنځ د مستقیمو پیغامونو په تبادله ترسره شوي دي.

په پام کې نیول شوې دوه پړاویزې هوکړه کې لومړی ۴۵ ورځنی اوربند او بیا د جګړې دایمي پای شامل دی. منځګړي په دې باور دي چې د هرمز تنګي بېرته پرانیستل او د ایران د بډایه شویو یورانیمو د موضوع حل یوازې په وروستۍ او دایمي هوکړه کې ممکن دی.

ایرانیانو په ډاګه کړې چې دوی د "غزې یا لبنان په څېر وضعیت" نه غواړي، چې اوربند یوازې پر کاغذ وي خو په عمل کې جګړه روانه وي. په ورته وخت کې، د ایران د سپاه پاسداران سمندري ځواکونو پر خپل سخت دریځ ټینګار کړی او ویلي یې دي چې د هرمز تنګي وضعیت به "هیڅکله" بېرته هغه حالت ته ونه ګرځي چې تر جګړې وړاندې و.

منځګړو ایراني چارواکو ته خبرداری ورکړی چې اوس د نورو تکتیکونو او وخت ضایع کولو لپاره فرصت نشته، ځکه راتلونکي ۴۸ ساعته د پراخې ویجاړۍ د مخنیوي لپاره وروستی چانس دی.