د جنوبي افریقا پولیسو د چهارشنبې په ورځ وویل چې د سه شنبې په ماښام د جوهانسبرګ په ختیځ کې په «کلیولینډ» سیمه کې په یوه غیر رسمي مېشتځای کې د وسلهوالو په ډزو کې لږ تر لږه ۱۲ کسان وژل شوي او ۹ نور ټپیان شوي دي.
پولیسو په یوه بیان کې ویلي چې دوی په «جمپرز» غیر رسمي مېشتځای کې له دغه برید وروسته د څه باندې ۱۰ شکمنو کسانو د نیولو لپاره لټون پیل کړی دی.
د پولیسو په وینا، په قربانیانو کې ۹ نارینه او ۳ ښځې شاملې دي. ۱۱ تنه یې د پېښې په ځای کې مړه شوي او دولسم کس په روغتون کې ساه ورکړې ده.
د برید انګېزه تر اوسه معلومه نه ده.
پولیسو ویلي چې شکمن کسان په یوه سپین رنګه «ټیوټا کوانټم» موټر کې راغلي وو، له دوو لارو څخه مېشتځای ته ننوتي او په څو ځایونو کې یې ډزې کړي دي، او وروسته په همدې موټر کې له سیمې تښتېدلي دي.
جنوبي افریقا په نړۍ کې د قتل د خورا لوړې کچې لرونکو هېوادونو څخه دی، چې هره ورځ پکې په اوسط ډول شاوخوا ۶۰ کسان وژل کېږي.
