د اسرائیلو قاتل  لومړي وزیر بنیامین نتنیاهو ادعا کړې چې هېواد یې باید د لسګونو میلیاردونو ډالرو په ارزښت د امریکا د پوځي مرستو پای ته رسېدو ته ځان چمتو کړي. نوموړي دا احتمال "یوازې د وخت خبره" بللې او زیاته کړې یې ده چې اسرائیل ښايي د زیاتېدونکو نړیوالو بندیزونو د مخنیوي په موخه د یوه بدیل ډیجیټل اقتصاد رامنځته کولو ته اړتیا ولري.

نتنیاهو، چې د نړیوالې جنايي محکمې د نیول کېدو له حکم او د فساد له روانو قضیو سره مخ دی، له سختو ټاکنو څو ورځې مخکې د اسرائیلو سوداګریز چینل (Channel 10) ته وویل چې هغه د احتمالي اقتصادي او بانکي بندیزونو لپاره د تیاریو امر کړی، چې په کې د بدیلو مالي ټیکنالوژیو موندل هم شامل دي.

هغه وویل: "که تاسو فکر کوئ چې موږ به هغې مرستې ترلاسه کولو ته دوام ورکړو چې ما دوه ځله خوندي کړې، او هغه د دفاعي بودیجې لپاره په لسګونو میلیارده ډالره امریکايي مرسته ده، نو ځانونه چمتو کړئ او له دې حقیقت سره ځانونه عادت کړئ چې دا به ونه شي، ځکه چې امریکا بدله شوې ده." هغه په ​​څرګنده توګه په غزه کې د اسرائیلو نسل وژنې، د لوېدیځې غاړې ظالمانه اشغال او د فلسطینیانو نږدې هره ورځ وژنو ته په پام سره په امریکا کې د دا ډول ملاتړ پر وړاندې مخ پر زیاتېدونکي مخالفت ته اشاره کوله.

نوموړي زیاته کړه: "دا پای ته رسېدلې، او پای ته به ورسېږي. دا یوازې د وخت خبره ده."

نتنیاهو د دغو مرستو د پای ته رسېدو لپاره کومه نېټه ورنه کړه او نه یې د امریکا کومه رسمي پرېکړه اعلان کړه، بلکې پر ځای یې د دې مرستو د احتمالي بندېدو لپاره د چمتووالي غوښتنه وکړه.

د احتمالي بندیزونو په اړه، هغه وویل چې اسراییل باید بدیل اقتصادي او مالي میکانیزمونه رامنځته کړي.

هغه وویل: "تاسو باید پوه شئ چې ښايي بندیزونه ولګول شي، په شمول د بانکي بندیزونو. تاسو اړتیا لرئ داسې یو اقتصاد چمتو کړئ چې له هغو (بندیزونو) څخه خوندي پاتې شي."

د دې پوښتنې په ځواب کې چې ایا د بلاکچین ټیکنالوژي (Blockchain) کولای شي له اقتصادي بندیزونو سره د مقابلې لپاره یو بدیل وړاندې کړي، نتنیاهو ځواب ورکړ: "هو، دا یوه له لارو څخه ده او ما لا دمخه د یوه پلان د چمتو کولو غوښتنه کړې ده."

نتنیاهو دا په ډاګه نه کړه چې له کوم هېواد څخه د بندیزونو تمه لري.

خو د هغه دا څرګندونې وروسته له هغه مخې ته راځي چې بریتانیا او څو نورو هېوادونو په اشغال شوې لوېدیځه غاړه کې د اسراییلو له غیرقانوني ښارګوټو څخه پر راتلونکو توکو بندیزونه ولګول. دا بندیزونه پر فلسطینیانو د یهودي ښارګوټي مېشتو د بریدونو او د نتنیاهو د افراطي حکومت له خوا د ښارګوټو جوړولو د تصویب په غبرګون کې ولګول شول.

نتنیاهو لاهم د امریکا له ادارې سره نږدې متحد دی، خو په غزه کې د اسراییلو له نسل وژنې راهیسې په امریکا کې په ځانګړې توګه د ځوانو امریکایانو ترمنځ نیوکې مخ په زیاتېدو دي.

د 'یهودي ترهګرۍ' پر وړاندې مبارزه

یایر لاپیډ، یو منځلاری پخوانی لومړی وزیر چې د نتنیاهو پر وړاندې د اپوزیسیون بلاک یوه برخه ده، دغه څرګندونو ته تېز غبرګون وښود.

لاپیډ وویل: "نتنیاهو اوس پخپلو ټکو دا مني: که د هغه حکومت بیا وټاکل شي، د امریکا امنیتي مرستې به پای ته ورسېږي او اسراییل به له داسې بندیزونو سره مخ شي چې زموږ اقتصاد به ویجاړ کړي، د بیو د لوړېدو لامل به شي او نه جبرانېدونکی زیان به واړوي."

د نتنیاهو دا څرګندونې په داسې حال کې مخې ته راځي چې هغه پر ایران د جګړې د بیا پیلولو ګواښ کوي؛ هغه هېواد چې د سختو نړیوالو بندیزونو لاندې یې کریپټو کرنسي (مجازي اسعار) او نور بدیل اقتصادي اقدامات خپل کړي دي.

د اپوزیسیون ډیموکراټ ګوند مشر یایر ګولان هم د نتنیاهو پر څرګندونو نیوکه وکړه او هغه یې له واقعیتونو څخه په لرېوالي تورن کړ.

هغه استدلال وکړ چې د اقتصادي بندیزونو مخنیوی د هغې "یهودي ترهګرۍ" پر وړاندې مبارزې ته اړتیا لري چې د اسراییلو نړیوال موقف ته زیان رسوي، همدارنګه د ستراتیژیکو متحدینو ساتلو او د راتلونکې اونۍ په ټاکنو کې د حکومت بدلولو ته اړتیا ده.

ګولان "له نتنیاهو، بن ګویر او دیري پرته" د یوه نوي حکومت غوښتنه وکړه، چې اشاره یې افراطي سیاستوال ایتامار بن ګویر او د شاس ګوند مشر آریه دیري ته وه.

دا څرګندونې د اسراییلو له پارلماني ټاکنو څلور ورځې مخکې، له لوېدیځو متحدینو سره د اړیکو او د اقتصادي بندیزونو د احتمالي پایلو په اړه د بحثونو په ترڅ کې مخې ته راغلې.

په ۲۰۱۶ کال کې له واشنګټن سره د لاسلیک شوي تړون له مخې، اسراییل د لسو کلونو په موده کې چې په ۲۰۲۸ کال کې پای ته رسېږي، ۳۸ میلیارده ډالره پوځي مرسته ترلاسه کوي.