د جاپان په شمالي او شمال ختیځو ساحلي سیمو کې د نږدې ۱۰ فټه (۳ متره) لوړې سونامي خبرداری ورکړل شوی دی.
د ځايي وخت له مخې، د دوشنبې په ماښام په جاپان کې د ۷.۴ درجې یوې زورورې زلزلې ټکانونه احساس شوي، چې ورسره د هېواد په شمالي او شمال ختیځو برخو کې د سونامي څپې هم لیدل شوې دي.

د امریکا د جیولوژیکي سروې ادارې د معلوماتو  له مخې، دا زلزله د ګرینویچ په وخت په ۰۷:۵۲ بجو ثبت شوې او مرکز یې د ایواتې (Iwate) ولایت د "میاکو" ښار څخه نږدې ۷۱ مایله لیرې په سمندر کې و. د جاپان حکومت د زلزلې کچه ۷.۵ ثبت کړې او د اوموري، هوکایدو او ایواتې ولایتونو د ارام سمندر پر ساحلي سیمو یې د سونامي خبرداری ورکړی دی.

د حکومت لخوا په خپره شوې خبرتیا کې راغلي: "هغه کسان چې په ساحلي سیمو یا د سیندونو غاړو ته نږدې دي، همدا اوس لوړو او خوندي ځایونو ته لاړ شي."

د "کیودو نیوز" په وینا، په اوموري او ایواتې ولایتونو کې د سونامي لومړنۍ څپې لیدل شوې دي. چارواکو خبرداری ورکړی چې د سونامي د څپو لوړوالی ۳ مترو (نږدې ۱۰ فټو) ته رسېدلی شي.
چارواکو ویلي چې په اوموري او میاګي ولایتونو کې په اټومي بټیو (فابریکو) کې کومه "غیرعادي پېښه" نه ده راپور شوې. بلخوا، له زلزلې وروسته چارواکو د پلازمینې توکیو او اوموري ولایت ترمنځ د چټکو (بولټ) اورګاډو تګ راتګ په بشپړه توګه وځنډاوه.

د جاپان لومړۍ وزیرې "سانای تاکایچي" په زلزله ځپلو سیمو کې له خلکو وغوښتل چې د احتمالي سونامي له امله هر څومره ژر چې کیږي "لوړو سیمو" ته پناه یوسي.

د دې راپور تر خپرېدو پورې، د کوم ځاني یا مالي زیان سمدستي راپور نه دی ورکړل شوی.