ایران په کویټ کې پر برېښناکوټ او د اوبو د تصفیې پر فابریکې برید کړی چې له امله يي یو هندي کارګر ژوند د لاسه ورکړی او د تاسیساتو زیان لیدلی .
په خلیجي عربي هیوادونو کې د اوبو د تصفیه کولو فابریکې د اوبو د رسولو لپاره خورا مهمې دي، او تر دې وړاندې هم د ایران په یو برید کې په بحرین کې د اوبو د تصفیه کولو یوې فابریکې ته زیان اوښتی و.
د کویټ د برېښنا وزارت د دوشنبې په ورځ وویل چې په کویټ کې پر یوه برېښناکوټ د ایران برید یو هندي کارګر وژلی او په دغه ځای کې یې یوې ودانۍ ته زیان رسولی دی.
د یاد وزارت یوې ویاندې، فاطمې عباس جوهر حیات، وویل: "د کویټ دولت پر وړاندې د ایران د تېري په ترڅ کې د برېښنا او اوبو د تصفیه کولو د یوې فابریکې پر خدمتي ودانۍ برید شوی، چې په پایله کې یې یو هندي کارګر وژل شوی او ودانۍ ته سخت مالي زیان اوښتی دی."
د کویټ رسمي خبري اژانس (کونا) راپور ورکړی چې د ایران په دغه برید کې د برېښنا او اوبو د تصفیه کولو فابریکه په نښه شوې، چې یو کارګر پکې وژل شوی او ۱۰ سرتیري ټپیان شوي دي.
په خلیجي عربي هیوادونو کې د اوبو د تصفیه کولو فابریکې د اوبو د تامین لپاره حیاتي رول لري. دا تاسیسات معمولاً له برېښناکوټونو سره یوځای جوړیږي، ځکه چې له اوبو تصفیه کولو او د څښاک وړ ګرځولو لپاره ډیرې انرژۍ ته اړتیا وي.
ایران تر دې وړاندې خبرداری ورکړی و چې که د دوی پر انرژۍ زیربناو برید وشي، دوی به په خلیج او اسرائیل کې د برېښنا او اوبو د تصفیه کولو تاسیسات په نښه کړي. دا وروستی برید د ایران پر برېښنايي شبکو د امریکا او اسرائیلو له تګلوري بریدونو وروسته شوی، چې له امله یې په تهران او البرز کې برېښنا پرې شوې وه.
د برېښنا وزارت ویلي چې تخنیکي او بېړني ټیمونه سمدلاسه د برید د اغیزو د مهارولو او د عملیاتو د عادي ساتلو لپاره سیمې ته لیږل شوي دي. دوی زیاته کړې چې چارواکي له امنیتي ادارو سره په همغږۍ بوخت دي ترڅو زیانمن شوی ځای خوندي کړي.
په سیمه کې کړکیچ وروسته له هغه زور اخیستی چې اسرائیل او امریکا د فبرورۍ په ۲۸مه پر ایران بریدونه پیل کړل، چې په ترڅ کې یې د پخواني مذهبي مشر علي خامنه ای په ګډون تر اوسه له ۱۳۴۰ څخه ډیر کسان وژل شوي دي. ایران په ځواب کې پر اسراییل، اردن، عراق او هغو خلیجي هیوادونو چې د امریکا پوځي اډې پکې دي، د بې پیلوټه الوتکو او توغندیو بریدونه کړي چې مرګ ژوبله او مالي زیانونه یې اړولي او نړیوال بازارونه او هوايي چلند یې ګډوډ کړی دی.
