د روسیې جګپوړی ډیپلوماټ ادعا کوي چې متحده ایالات د نورډ سټریم د نل لیکو په نیولو سره د نړۍ پر انرژۍ د تسلط هڅه کوي.
د روسیې د بهرنیو چارو وزیر سرګي لاوروف وویل، امریکا په بالتیک سمندر کې د نورډ سټریم د ګازو پر نل لیکو د کنټرول هڅه کوي، کومې چې د ۲۰۲۲ کال په سپټمبر کې په یوې مرموزې چاودنه کې زیانمنې شوې وې.
تر درې کاله ډېر وخت مخکې هغو چاودنو چې دغه نل لیکې یې ویجاړې کړې، تر ډېره بریده یې اروپا ته د روسیې د ګازو لېږد پرې کړ او پر دغې لویه وچه یې د انرژۍ پر اکمالاتو فشار راوړ، که څه هم روسیې لا دمخه تر ډېره بریده د ګازو لېږد درولی و.
روسیې او لوېدیځو هېوادونو دواړو ویلي چې دا پېښه یو سبوتاژي عمل و. پلټونکو کلونه هڅه وکړه چې د دې پېښې تر شا د پټو کسانو راز معلوم کړي، او تېر کال په ایټالیا کې یو اوکراینی سړی د بریدونو د همغږي کولو په تور ونیول شو.
له فرانس تلویزیون سره په یوه مرکه کې، لاوروف د پنجشنبې په ورځ پر متحده ایالاتو تور ولګاوه چې د نړۍ د انرژۍ پر بازارونو د تسلط لپاره فشار راوړي. هغه د بېلګې په توګه وینزویلا ته اشاره وکړه – چېرې چې واشنګټن اوس د هغه هېواد د تیلو پر پراخو زېرمو د پام وړ کنټرول لري – او په ایران کې یې وروستي تحولات یاد کړل.
د روسیې د بهرنیو چارو وزارت له خوا د خپرې شوې مرکې د متن له مخې، لاوروف وویل: "متحده ایالات اوس دا هم وايي چې غواړي د نورډ سټریم نل لیکې په خپل واک کې واخلي."
هغه نور جزئیات ورنه کړل.
وال سټریټ ژورنال په ۲۰۲۴ کال کې راپور ورکړی و چې یو امریکايي پانګه وال، سټیفن پي. لینچ، هڅه کوله چې د نورډ سټریم ۲ دوه شاخیزه نل لیکه وپېري، چې یوه څانګه یې لا هم سالمه پاتې ده.
