په عیدګاه جومات کې، سمیره محمدي د خپل ۲۰ کلن زوي عارف خان لپاره ژړل، چې یوازې دوه اونۍ وړاندې په دغه روغتیایي مرکز کې بستر شوی و. هغې له (فرانس پریس اژانس) سره په خبرو کې د خپلو اوښکو د ډب کولو هڅه کوله او ویې ویل: "ما ته وویل شول چې د هغه بدن په ایرو بدل شوی دی."

د جومات په انګړ کې شاوخوا ۶۰ لرګین تابوتونه ایښودل شوي وو. سلګونه نارینه، چې ډیری یې د قربانیانو خپلوان وو، د مړو لپاره د لمانځه په صفونو کې ولاړ وو. د افغانستان د عامې روغتیا وزارت ویاند شرافت زمان  اژانس فرانس پرس ته وویل: "دلته شاوخوا ۶۰ جسدونه دي،" او زیاته یې کړه چې د نورو قربانیانو د پیژندنې لړۍ لا هم روانه ده.

هغو کورنیو چې لا تر اوسه یې خپل ورک شوي عزیزان نه وو موندلي، د تابوتونو د سرونو د پورته کولو هڅه کوله ترڅو وګوري چې ایا خپل مړي پیژني که نه. له لمانځه وروسته، تابوتونه د کابل پر یوه غونډۍ ډله ییز قبر ته یوړل شول، چیرته چې تیره چهارشنبه د دغه برید شاوخوا ۵۰ نور قربانیان هم ښخ شوي وو.

پاکستان او افغانستان له میاشتو راهیسې په نښته کې دي؛ اسلام اباد پر کابل تور پورې کوي چې هغو سختدریځو ته یې پناه ورکړې چې د دوی پر خاوره پولې پورې غاړه بریدونه کوي. په کابل کې چارواکي دا تور ردوي.

پاکستان ټینګار کوي چې د مارچ د ۱۶مې نیټې بمباري یې پر "پوځي تاسیساتو او د ترهګرو د ملاتړ پر بنسټونو" یو دقیق برید و. خو شرافت زمان وویل چې د مړو شمیر اوس ۴۱۱ تنو ته رسیدلی دی.

په افغانستان کې د ملګرو ملتونو مرستندویه ماموریت (یوناما) ویلي چې د دوی لومړنۍ شمیرې ۱۴۳ مړه او ۱۱۹ ټپیان ښيي، خو زیاته یې کړه چې دا شمیره "ډیر احتمال لري چې لوړه شي." د ملګرو ملتونو د هغو شمیرو له مخې، چې د روږدو کسانو د درملنې پر مرکز برید پکې شامل نه دی، د فبرورۍ له ۲۶مې راهیسې لږ تر لږه ۷۶ افغان ملکیان په نورو پیښو کې وژل شوي دي.