د شمالي کوریا مشر د خپل پوځ له جګپوړو قوماندانانو سره په کتنه کې د هېواد د سویلي پولې په اوږدو کې د دفاعي ځواکونو د ستر پیاوړي کولو امر کړی دی.
د شمالي کوریا د مرکزي خبري اژانس (KCNA) د راپور له مخې، کیم جونګ اون د یکشنبې په ورځ د پوځ د بېلابېلو غونډونو له قوماندانانو سره یوه غونډه وکړه ترڅو پر مهمو نظامي او سیاسي دندو خبرې وکړي.
هغه د سویلي پولې ساتونکو د لومړۍ کرښې د قطعاتو پر پیاوړتیا او د دې سیمې پر یوې مستحکمې کلا د بدلولو پر اهمیت ټینګار وکړ. کیم همداراز د جګړې د مخنیوي د کچې لوړولو په موخه د نظامي جوړښتونو پر عصري کولو او په «نظامي او تخنیکي» توګه د قطعاتو پر پیاوړي کولو ټینګار وکړ.
هغه زیاته کړه چې د پوځ «ستراتېژیک اقدام» به «نوی» شي او په دې هڅو کې به «یو لوی بدلون» رامنځته شي. کیم د پوځ د روزنیز سیسټم د بیا تنظیمولو او له عصري ټکنالوژۍ سره سم د عملي جنګي تمریناتو د پراخولو غوښتنه وکړه.
هغه له قوماندانانو وغوښتل چې د شمالي کوریا د «اصلي او ستر دښمن» په اړه خپله هوښیاري او بیداري زیاته کړي، چې اشاره یې په ښکاره ډول سویلي کوریا ته وه. په دې غونډه کې د لوی درستیز «ري یونګ ګیل» او د ملي دفاع وزارت سلاکار «پاک جونګ چون» هم ګډون درلود.
دا څرګندونې په داسې حال کې کېږي چې د شمالي کوریا د ښځو د فوټبال ملي لوبډله د یکشنبې په ورځ سویلي کوریا ته ورسېده. دا په تېرو نږدې اتو کلونو کې د اسیا د اتلانو لیګ د نیمه پایلوبې لپاره د دغه هېواد د یوې ورزشي ډلې لومړی سفر دی.
سره له دې، د دواړو کوریاګانو ترمنځ اړیکې په خورا ټیټه کچه کې پاتې دي او پیونګ یانګ د خبرو اترو لپاره د سېول پرله پسې وړاندیزونو ته تر اوسه ځواب نه دی ویلی.
