دمیتري پیسکوف وویل: "موږ په دې برخه کې د تورکیې له لوري منندوی یو."
د روسیې د ولسمشرۍ د ماڼۍ (کرملین) ویاند دمیتري پیسکوف څرګنده کړه چې دوی د اوکراین د کړکېچ د حل په موخه د تورکیې په منځګړیتوب د مذاکراتو بیا پیلولو ته چمتو دي او ویې ویل: "موږ په دې اړه د تورکیې له لوري منندوی یو."
دیمیتري پیسکوف په پلازمېنه مسکو کې خبریالانو ته د ورځې د مهمو موضوعاتو په اړه ارزونه وکړه.
له نوموړي څخه د دغې پوښتنې په ځواب کې چې: "د بهرنیو چارو وزیر هاکان فیدان اعلان وکړ چې انقره به د روسیې او اوکراین ترمنځ د خبرو اترو تنظیمولو ته دوام ورکړي او د موضوع د حل لپاره به خپلو دیپلوماتیکو هڅو ته دوام ورکړي؛ کرملین د تورکیې په منځګړیتوب د اوکراین په اړه د خبرو اترو د بیا پیلولو احتمال څنګه ارزوي؟" پیسکوف داسې وویل:
"موږ پوهېږو چې زموږ تورکي دوستان د اوکراین د وضعیت د سوله ییز حل لپاره د خپلو هڅو دوام ته چمتو دي. موږ په دې برخه کې د تورکیې له لوري منندوی یو. اوس مهال په لنډمهاله توګه د مذاکراتو د بهیر د بیا پیل لپاره کومه تمه نشته، او موږ داسې کومه نښه نه ده لیدلې. خو روسي لوری دغه لار (مذاکراتو) ته چمتو دی."
