د تورکیې د بهرنیو چارو وزیر هاکان فیدان ویلي، باور لري چې امریکا او ایران دواړه دا مهال د جګړې د درولو او یوې تلپاتې هوکړې ته د رسېدو لپاره "کافي اراده" ښيي. هغه خبرداری ورکړ چې د کړکېچ بیا پیلېدل به سیمه ییز ثبات او نړیوال اقتصاد ته زیان ورسوي.
فیدان د سې شنبې په ورځ له الجزیرې ټلویزیون سره په مرکه کې وویل چې د تورکیې سمدستي لومړیتوب دا دی چې ډاډ ترلاسه کړي چې د واشنګټن او تهران ترمنځ اوربند دوام ومومي.
هغه وویل: "زموږ تر ټولو مهمه اندېښنه دا ده چې وګورو اوربند ټینګ دی او که نه، دا هغه څه دي چې موږ ورته اوس مهال ډیر پام کوو. زه فکر کوم اوس د جګړې د درولو لپاره په دواړو لورو کې کافي اراده شتون لري."
فیدان خبرداری ورکړ چې د جګړې بیا پیلېدل کولی شي د پراخې بې ثباتۍ لامل شي او د نړیوال اقتصاد او انرژۍ د امنیت په اړه اندېښنې لا پسې ژورې کړي. هغه زیاته کړه: "دا (جګړه) د پراخیدو، د نورو تراژیدیو او ډرامو، او د نړۍ په اقتصاد او سیمه ییز ثبات باندې د منفي اغیزو وړتیا لري."
د تورکیې د بهرنیو چارو وزیر همداراز د هرمز تنګي کې د کښتۍ چلولو د ازادۍ پر بیا رامنځته کېدو ټینګار وکړ لکه څنګه چې د جګړې دمخه وه. هغه وویل: "موږ غواړو د ټولو کښتیو ازاده تګ راتګ وګورو، لکه څنګه چې د جګړې دمخه روان و."
هغه خبرداری ورکړ چې د پراخ نړیوال منلو پرته د نوي نظم یا ترتیب تحمیلول "د یوې نوې شخړې سرچینه" ګرځېدلی شي.
فیدان دا هم وویل چې ترکیه د پاکستان په مشرۍ د منځګړیتوب له هڅو ملاتړ کوي چې د قطر په ګډون د سیمې له هېوادونو سره په همغږۍ ترسره کیږي. هغه وویل، انقره په دې باور ده چې د امریکا او ایران په شته وړاندیزونو کې بدلون او د داسې "منلو وړ کلمو" موندل ممکن دي چې دواړه لوري پرې موافقه وکړي.
فیدان وویل: "کله ناکله د منځګړیتوب پر مهال تر ټولو سخته خبره دا وي چې کله کار بند شي، نو تاسو د خلاقو افکارو په لټه کې شئ. له همدې امله تاسو ځینو بهرنیو او باوري شریکانو ته اړتیا لرئ." هغه یادونه وکړه چې سیمه ییز هېوادونه هڅه کوي چې په دې ډیپلوماټیک بهیر کې خپله ونډه واخلي.
