د راپورونو له مخې، د امریکا ولسمشر د دوشنبې په ورځ په سپینه ماڼۍ کې د خپل ملي امنیت له ټیم سره وکتل، چېرته چې سلاکارانو ورته د تهران د پلان په اړه معلومات ورکړل.
ټرمپ د هرمز تنګي د پرانستلو په اړه د ایران پر وړاندیز ناراضه دی امریکايي رسنۍ وايي، ټرمپ او د هغه د ملي امنیت ټیم د هرمز تنګي د بیا پرانستلو په اړه د ایران پر وړاندیز شکمن دي.
د خپرو شویو راپورونو له مخې، ولسمشر ډونالډ ټرمپ د هرمز تنګي د بیا پرانستلو او له ایران سره د امریکا او اسرائیل د جګړې د پای ته رسولو په اړه د ایران پر وړاندیز خوښ نه دی. نیویارک ټایمز د هغو سرچینو له قوله چې په دې اړه ورته معلومات ورکړل شوي، لیکلي چې ټرمپ ته د دوشنبې په ورځ د سپینې ماڼۍ په (د ځانګړو حالاتو خونه) کې د تهران د پلان په اړه معلومات ورکړل شول. په دې پلان کې د ایران دا غوښتنه هم شامله وه چې امریکا باید پر دغې حیاتي اوبلارې خپله کلابندي (بندیز) پای ته ورسوي.
ګڼو امریکايي او ایراني چارواکو "ټایمز" ته ویلي چې په دغه وړاندیز کې د ایران د اټومي پروګرام په اړه هیڅ یادونه نه ده شوې. ایران له دې وړاندې د یورانیمو د بډاینې د درولو په اړه د امریکا غوښتنې رد کړې وې او ټینګار یې کاوه چې دا د نړیوالو قوانینو له مخې د دوی حق دی. تر اوسه ایران د هغه یورانیمو له سپارلو هم ډډه کړې چې دمخه یې بډای کړي دي.
لا تر اوسه په دقیق ډول معلومه نه ده چې ټرمپ د وړاندیز له کومې برخې ناراضه دی، خو هغه له پخوا راهیسې د ایران د اټومي پروګرام په اړه پر خپلو دوو غوښتنو (د بډاینې ودرول او د موادو سپارل) ټینګار کړی دی. د سپینې ماڼۍ ویاندې اولیویا ویلز ټایمز ته وویل: «امریکا به د رسنیو له لارې مذاکرات ونه کړي؛ موږ خپلو سرو کرښو کې روښانه یو او ولسمشر به یوازې داسې معامله وکړي چې د امریکا د خلکو او نړۍ په ګټه وي.»
د سولې خبرو ته یو بل ګوزار؟ "اکسیوس" خبري وېبپاڼې لومړی د یکشنبې په ورځ د دغه وړاندیز په اړه راپور ورکړی و او ویلي یې وو چې د ایران د بهرنیو چارو وزیر عباس عراقچي دا وړاندیز پاکستاني منځګړیو ته سپارلی دی. د دغه وړاندیز له مخې، اوربند به د اوږدې مودې لپاره وغځول شي یا به دایمي شي، خو اټومي خبرې به یوازې هغه وخت پیل شي چې د هرمز تنګی پرانستل شي او بندیزونه لیرې شي.
ټرمپ تېره اونۍ د ایران یو بل وړاندیز هم رد کړی و، چې له امله یې هغه مذاکرات هم لغوه شول چې ټاکل شوې وه د رخصتیو په ورځو کې په اسلام اباد کې وشي. امریکايي چارواکو نیویارک ټایمز ته ویلي چې ایران خپلو مذاکره کوونکو ته د اټومي پروګرام په اړه د هیڅ ډول امتیاز ورکولو اجازه نه وه ورکړې، چې دا د سولې خبرو ته یو لوی ګوزار ګڼل کېږي.
اوس د ټرمپ په اداره کې بحث پر دې راڅرخي چې ایران به د هرمز تنګي د روانې محاصرې له امله تر کومه حده اقتصادي فشار وزغملی شي. د راپور له مخې، د ایران د تېلو تولید د ذخیره کولو له ظرفیت څخه په چټکۍ سره زیاتېږي او د تېلو څاګانې په اسانۍ نشي بندېدلی. که دا څاګانې بندې شي، ایران ته به سخت زیان ورسېږي، له همدې امله په اداره کې ځینې کسان پدې باور دي چې ایران به د زیان ګاللو پر ځای معاملې ته غاړه کېږدي.
