امنیتي چارواکو د سې شنبې په ورځ وویل چې د تحریک طالبان پاکستان (TTP) وسله والو د پاکستان په شمال لوېدیځ کې پر یوې امنیتي پوستې په برید کې ۶ نیمه پوځي سرتېري وژلي او ۸ نور یې تښتولي دي.

یوه امنیتي چارواکي د نوم نه ښودلو په شرط فرانس پریس (AFP) خبري اژانس ته وویل چې د دوشنبې په ورځ په لسګونو وسله والو، چې د برید مسؤلیت یې منلی، د پېښور ښار پر یوې امنیتي پوستې د سپکو وسلو، لاسي بمونو او هاوانونو په واسطه برید وکړ.

بل امنیتي چارواکي د پاکستان ملېشه ځواکونو  ته په اشارې سره وویل: "د ملېشه ځواکونو شپږ سرتېري وژل شوي او څلور نور ټپیان دي." دا ځواکونه په خیبر پښتونخوا کې، چې له افغانستان سره سرحد لري، د لومړۍ کرښې امنیتي چارې پر غاړه لري.

دغې سرچینې زیاته کړه: "وسله والو ۸ سرتېري له ځان سره بیولي او نامعلوم ځای ته یې لېږدولي دي."

د پاکستان پوځ تر اوسه د دې پېښې په اړه د تبصرې غوښتنې ته ځواب نه دی ویلی. خو تحریک طالبان پاکستان په خپلو ټولنیزو رسنیو کې د هغو کسانو یو انځور خپور کړی چې دوی تښتولي او د برید مسؤلیت یې منلی دی.

پاکستان په خپلو لوېدیځو سیمو کې له مخ په زیاتېدونکو ناامنیو سره مخ دی. اسلام اباد پر کابل تور پورې کوي چې وسله والو ته یې په خپله خاوره کې پناه ورکړې ده، خو په کابل کې د افغان طالبانو حکومت دا ادعاوې په وار وار رد کړې دي.

تېره میاشت هم په خیبر پښتونخوا کې په بېلابېلو بریدونو کې ۲۶ کسان ووژل شول.

په وروستیو میاشتو کې د وسله والو د فعالیتونو پر سر د کابل او اسلام اباد اړیکې سختې ترینګلې شوې دي. دا ډیپلوماټیکه ترینګلتیا ان تر خونړیو سرحدي نښتو او د افغانستان په خاوره کې د پاکستان تر هوايي بریدونو پورې رسېدلې ده.