د اسرائيلو بریدونو په جنوبي لبنان کې پر یوه مرستندویه اداره او یوه روغتون برید وکړ، چې لږترلږه اته کسان یې ووژل، په داسې حال کې چې تل ابیب د امریکا په منځګړیتوب د اوربند اعلان کمزوری کوي.
د لبنان رسنیو د سې شنبې په ورځ راپور ورکړ چې د اوربند سره سره، په لبنان کې د اسرائيلو بریدونو لږترلږه اته کسان وژلي دي، چې پکې د غاښونو یو ډاکټر او د هغه دوه ماشومان هم شامل دي.
د اکسیوس د راپور له مخې، دا نوي بریدونه لږ وروسته له هغه وشول چې د امریکا ولسمشر ډونالډ ټرمپ د دوشنبې په ورځ د اسرائيلو له لومړي وزیر بنیامین نتنیاهو سره په غوسه تلیفوني اړیکه ونیوله او له هغه یې وغوښتل چې د لبنان پر سیمو بریدونه او اشغال ودروي.
ټرمپ ویلي چې هغه د منځګړو له لارې له حزب الله سره اړیکه نیولې او له دواړو لورو یې ډاډ ترلاسه کړی چې «ټولې ډزې به ودرول شي ».
د ملي خبري اژانس (NNA) په وینا د اسرائيلو په یوه برید کې، د غاښونو یو ډاکټر او د هغه دوه ماشومان هغه وخت ووژل شول کله چې اسراییلي ډرون د لبنان په سویل کې د نباتیه - خردالي سړک باندې د دوی موټر وویشت.
د ډرون په یوه بل برید کې د سوریې دوه کارګران چې د جیبچیت په ښار کې يې کار کاوه د بوټو په یوه نرسري کې ووژل شول.
ادارې وویل چې په تول کې په موټرسایکل او په انصار کې په موټر کې د ډرون په بریدونو کې دوه نور کسان ووژل شول.
د اسرائيلو یوې بې پیلوټه الوتکې هم د هروف-طول په څلور لارې کې یو موټر وویشت، چې چلوونکی یې ووژل شو.
اسرائيلو په مرستندویه اداره او روغتون برید وکړ
اسرائيلي جیټ الوتکو د کفار سیر ښار په مسیل سړک کې د لبنان د ملکي دفاع په مرکز هم هوایی برید وکړ، چې تاسیسات یې ویجاړ کړي.
د لبنان ملي خبري اژانس (NNA) ویلي چې دغه مرکز څو ورځې وړاندې تخلیه شوی و.
په جلا برید کې، اسرائيلي الوتکو د ټایر ولسوالۍ د منصوري په ښارګوټي کې د سهار وختي هوايي برید کړی، چې هم مهاله په سیمه کې د توپچي ډزې هم شوې دي.
بریدونو د ټایر په الحوش کې یو کور هم په نښه کړی، چې ویجاړ یې کړ او څو نږدې کورونه یې زیانمن کړل. له کنډوالو څخه دوه ټپیان راایستل شوي او روغتون ته لېږدول شوي دي.
په ورته وخت کې، NNA وویل چې د دوشنبې په ورځ د ټایر په جبل عامل روغتون باندې د برید له امله د مړو شمیر څلورو ته لوړ شوی، او ۵۰ نور ټپیان شوي دي.
دغه برید د روغتون په څانګو، د موټرو په پارکینګ او نږدې ودانیو کې پراخ زیانونه اړولي دي.
د راپورونو له مخې، اسرائيل د اوربند له هغه تړون سره سره چې د اپریل په ۱۷مه نافذ شوی و او وروسته د امریکا په منځګړیتوب د ۴۵ ورځو لپاره غځول شوی و، پر لبنان خپل یرغل ته دوام ورکړی دی.
د لبنان د روغتیا وزارت په وینا، د مارچ له دوهمې نیټې راهیسې، کله چې اسرائيلو په لبنان باندې د بریدونو نوې څپه پیل کړه، په بریدونو کې له ۳۴۰۰ څخه ډیر کسان وژل شوي دي.
