د ملګرو ملتونو د بشري حقونو د څار ماموریت خبر ورکړی چې د پولې پورې غاړې د سختو بریدونو له امله، د کال په لومړیو شپږو میاشتو کې ۱,۳۹۶ ملکي وګړي وژل شوي او ۷,۹۷۸ نور ټپیان شوي دي.
ملګرو ملتونو د سې شنبې په ورځ په یوې اعلامیه کې ویلي چې د روسیې او اوکراین ترمنځ روانه جګړه کې د ملکي وګړو مرګ ژوبله د روان کال په لومړۍ نیمایي کې ۳۷ سلنه زیاته شوې ده.

په اوکراین کې د ملګرو ملتونو د بشري حقونو د څار ماموریت مشرې، ډانیل بیل په جینوا کې خبریالانو ته وویل: "موږ د ۱,۳۹۶ ملکي وګړو مړینه او د ۷,۹۷۸ نورو ټپي کېدل مستند کړي دي... دا د تېر کال د ورته مودې په پرتله ۳۷ سلنه زیاتوالی ښيي."

روسیې او اوکراین، چې پر ملکي وګړو بریدونه ردوي، په وروستیو میاشتو کې پر یو بل بریدونه وروسته له هغه زیات کړي چې د نږدې څلور نیم کلنې جګړې د پای ته رسولو لپاره د امریکا په مشرۍ خبرې اترې له خنډ سره مخ شوې.

د ملګرو ملتونو د بشري حقونو دفتر په وروستیو ورځو کې په اوکراین او روسیه کې هغه ګڼ شمېر بریدونه وغندل چې د ملکي وګړو د مرګ ژوبلې لامل شوي دي.

ویاند ثمین الخیطان خبریالانو ته وویل: "ملکي وګړي او ملکي بنسټونه د نړیوالو بشري قوانینو له مخې په کلکه خوندي دي او دا ډول قصدي بریدونه جنګي جنایت ګڼل کېږي."