د هرمز تنګي په کړکېچ کې، د ایران یوې وسله والې کښتۍ عمان ته نږدې یوه کانټینري کښتۍ په نښه کړه، چې درانه مالي زیانونه یې واړول خو له نیکه مرغه چې چاته پکې ځاني زیان ندی اوښتی.
د بریتانیا د سمندري امنیت ادارې ویلي چې د چهارشنبې په ورځ د عمان په ساحل کې یوې ایراني توپچي کښتۍ په یوه کانټینري کښتۍ ډزې وکړې، چې زیان یې اړولی خو څوک پکې نه دي ټپیان شوي.
د انګلستان د سمندري سوداګرۍ عملیاتو مرکز ویلي چې د کانټینري بېړۍ کپتان راپور ورکړی چې کښتۍ ته د ایران د اسلامي انقلابي ګارډ یوه کښتۍ نږدې شوه او بیا یې ډزې وکړې، چې پل ته یې دروند زیان رسولی دی، خو اور لګېدنه یا چاپېریالي اغېز نه دی رامنځته شوی.
مرکز زیاته کړه چې پېښه د عمان له ساحله شاوخوا ۱۵ سمندري میله شمال ختیځ کې رامنځته شوې او د عملې ټول غړي خوندي دي.
د بريتانیا د سمندري امنیت شرکت وانګارډ ټیک په وینا، کښتۍ د لایبریا بیرغ لاندې روانه وه او "خبر ورکړل شوی و چې د هرمز تنګي ته د تګ اجازه لري".
خو د ایران خبري اژانس “تسنیم” وویل چې بېړۍ د ایران د وسله والو ځواکونو خبرداریو ته پام نه و کړی.
د دغه ستراتیژیک تنګي له لارې د کښتۍ تګ راتګ د وروستیو شخړو له امله سخت محدود شوی، په داسې حال کې چې امریکا د ایران د بندرونو د محدودولو هڅې کوي.
د امریکا ولسمشر ډونالډ ټرمپ د چهارشنبې په ورځ اعلان وکړ چې د دواړو هېوادونو ترمنځ اوربند به د اپریل له اتمې نیټې وروسته وغځول شي.
