د برېتانیا حکومت په رسمي ډول اعلان وکړ: «موږ د روسیې سفیر راوغوښت ترڅو ورته د متقابل اقدام خبر ورکړو؛ چې له مخې یې د یوه روسي ډیپلومات اعتبارنامه لغوه کوو او هغه له هېواده وباسو.»
برېتانیا د یو متقابل اقدام په ترڅ کې یو روسي ډیپلومات له هېواده وباسي؛ دا پرېکړه وروسته له هغه کېږي چې تېره میاشت روسیې یو برېتانوي ډیپلومات د جاسوسۍ په تور له خپلې خاورې ایستلی و.
په لندن کې د روسیې سفیر د بهرنیو چارو وزارت ته وروسته له هغه وغوښتل شو چې مسکو تېره میاشت په «ناحقه» ډول یو برېتانوي ډیپلومات وایست. اوس د برېتانیا حکومت د یوه روسي ډیپلومات اعتبار لغوه کړی دی، چې دا په دې معنا ده چې نوموړی به له هېواده وشړل شي.
په هغې رسمي اعلامیه کې چې د چهارشنبې په ورځ خپره شوې، راغلي دي: «موږ د تېرې میاشتې په ترڅ کې د بل برېتانوي ډیپلومات د شړلو په اړه د روسیې ناحقه پرېکړه او هغه ناوړه تبلیغاتي کمپاین چې ورپسې پیل شو، په کلکه غندو. دا ډول چلند په هیڅ صورت د منلو وړ نه دی او موږ به د خپلو ډیپلوماتیکو کارکوونکو ځورونه او ګواښل ونه زغمو.»
په اعلامیه کې زیاته شوې ده: «د روسیې پرلهپسې او بې دلیله اقدامات زموږ د
ډیپلوماتیکو چارو د ګډوډولو لپاره دي او دا د برېتانیا په وړاندې د هغوی د
تیريګر چلند یوه برخه ده. که روسیه په دې برخه کې نور ګامونه پورته کړي، نو دا به د کړکېچ د زیاتولو په معنا وي او له کلک او مناسب ځواب سره به مخ شي.»
د ۲۰۲۲ کال په فبرورۍ کې پر اوکراین د کرملین له برید وروسته، د روسیې او ناټو غړو هېوادونو ترمنځ اړیکې د سړې جګړې راهیسې تر ټولو ټیټې کچې ته رسېدلې دي؛ چې له امله یې دواړو لورو په کراتو د یو بل ډیپلوماتان ایستلي دي.
روسیې له دې وړاندې هم په مسکو کې مېشت برېتانوي ډیپلوماتان د جاسوسۍ په تور ایستلي وو؛ خو برېتانیا دغه تورونه «ناوړه او بې بنسټه» بللي دي.
