په استانبول کې د پولیسو پر یوې پوسته د ترهګریز برید په تړاو د نیول شویو کسانو شمېر ۱۰ ته ورسېد. دا وروسته له هغه چې د چهارشنبې په ورځ پنځه نور شکمن کسان هم د پولیسو لخوا ونیول شول.
د استانبول د لوی څارنوالۍ دفتر لخوا د هغې حملې په اړه څېړنې په شدت سره روانې دي چې د سه شنبې په ورځ د استانبول په "بشیکتاش" سیمه کې د اسرائیلو قونسلګرۍ ته نږدې د "یاپي کریدي پلازا" مخې ته پر یوې امنیتي پوسته شوې وه.
د دې پلټنو په لړ کې، پولیسو په استانبول او "کوجایلي" ښارونو کې په نښه شویو ادرسونو عملیات ترسره کړل او پنځه نور کسان یې ونیول. په ټوله کې د نیول شویو کسانو شمېر ۱۰ ته ورسېد، چې په هغو کې دوه ټپي بریدګر هم شامل دي چې اوسمهال په روغتون کې تر درملنې لاندې دي. تمه کیږي چې دغه دوه بریدګر به تر درملنې وروسته د پولیسو توقیف خونې ته ولېږدول شي.
د چارواکو په وینا، د سه شنبې په ورځ د برید پر مهال د پولیسو او بریدګرو ترمنځ نښته وشوه چې په پایله کې یې درې بریدګر ووژل شول او دوه پولیس افسران برسېرن ټپیان شول.
ولسمشر رجب طیب اردوغان د دفاعي صنایعو د یوې فابریکې په پرانیسته کې دغه برید وغانده او ویې ویل: "موږ په استانبول کې دا ناوړه برید غندو، چې زموږ د اتلو امنیتي ځواکونو په مداخله شنډ شو." هغه ټینګار وکړ چې ترکیه به د ترهګرۍ د هر ډول بڼې پر وړاندې مبارزې ته دوام ورکړي او اجازه به ورنکړي چې "بې ارزښته او پلان شوې پارونې" د هېواد امنیت ته زیان ورسوي.
