د حماس پلاوي په غزه کې د سولې د ټینګښت په برخه کې د تورکیې له هڅو مننه وکړه.
د تورکیې د امنیتي سرچینو په وینا، د تورکیې د ملي استخباراتو د ادارې (MIT) مشر ابراهیم قالن د حماس د سیاسي دفتر د مذاکراتي ټیم له مشر خلیل الحیه مشري پلاوي سره په لیدنه کې په غزه کې د وضعیت په اړه خبرې وکړي.
دغه لیدنه، چې د سه شنبې په ورځ په انقره کې ترسره شوه، په غزه کې د اسرائیلو پر روانو بریدونو، د بشري وضعیت پر خرابیدو، په اشغال شوې لویدیځه غاړه کې د غیرقانوني میشتو یهودانو پر تاوتریخوالي او په بیت المقدس کې په الاقصی جومات باندې پر لګول شویو محدودیتونو متمرکزه وه.
چارواکو ټینګار وکړ چې اسرائیل باید د غزې د سولې د پلان د لومړي پړاو پر بنسټ خپلې ژمنې پوره کړي، او په تفصیل سره یې هغه ګامونه وڅیړل چې د دویم پړاو د پیل لپاره ورته اړتیا ده.
د حماس پلاوي په غزه کې د سولې د ودې لپاره د تورکیې له هڅو مننه وکړه او د دې موضوع په اړه یې د انقرې د دوامداره هڅو له امله د ولسمشر رجب طیب اردوغان ته د مننې پیغام ورساوه.
د حماس پلاوي همداراز د تورکیې د بهرنیو چارو له وزیر هاکان فیدان سره هم یوه جلا لیدنه ترسره کړه.
