هاکان فیدان د خپلو سعودي عربستان، قطر، مصر او ایران له سیالانو او همدارنګه د اروپايي ټولنې د بهرني سیاست له مشرې، امریکایي او پاکستاني چارواکو سره ټیلیفوني خبرې وکړې.
د تورکیې د بهرنیو چارو وزیر هاکان فیدان په منځني ختیځ کې د روانې جګړې د پای ته رسولو د هڅو په اړه له خپلو سعودي او قطري سیالانو او پاکستاني چارواکو سره خبرې وکړې.

د تورکیې د  ډیپلوماټیکو سرچینو د معلوماتو له مخې، فیدان د یکشنبې په ورځ د قطر د بهرنیو چارو وزیر محمد بن عبدالرحمن آل ثاني، د سعودي عربستان د بهرنیو چارو وزیر فیصل بن فرحان آل سعود او له پاکستاني چارواکو سره جلا جلا ټیلیفوني خبرې اترې وکړې.

تر دې وړاندې، د تورکیې د بهرنیو چارو وزیر د ایران له بهرنیو چارو وزیر عباس عراقچي، د مصر له بهرنیو چارو وزیر بدر عبدالعاطي، د اروپايي ټولنې د بهرني سیاست له مشرې کایا کالاس او له امریکایي چارواکو سره د جګړې د پای ته رسولو لپاره پر "اړینو ګامونو" بحث کړی و. د دغو خبرو په اړه نور جزیات نه دي ورکړل شوي.

په سیمه کې کړکېچ وروسته له هغه په شدت سره زیات شو چې امریکا او اسرائیلو د فبرورۍ پر ۲۸مه پر ایران ګډه جګړه پیل کړه. په دغه جګړه کې تر اوسه له ۱۳۰۰ څخه ډېر کسان وژل شوي، چې په هغو کې د ایران د هغه وخت ستر رهبر علي خامنه‌یي هم شامل و.

ایران په ځواب کې پر اسرائیلو او دغه راز پر اردن، عراق او د خلیج پر هغو هېوادونو چې د امریکا پوځي تاسیسات په کې دي، د بې پیلوټه الوتکو (ډرون) او توغندیو بریدونه کړي دي. دغو بریدونو د ځاني تلفاتو او بنسټیزو تاسیساتو د ویجاړولو ترڅنګ، نړیوال بازارونه او هوايي چلند هم له خنډ او ځنډ سره مخ کړي دي.

ایران همدارنګه د هرمز ستراتیژیکه تنګي د ډېری کښتیو پر مخ تړلې ده؛ دا د تېلو د لېږد یوه خورا مهمه لاره ده چې په عادي حالت کې ترې هره ورځ نږدې ۲۰ میلیونه بېرل تېل او د نړۍ د مایع طبیعي ګاز (LNG) نږدې ۲۰ سلنه سوداګري ترسره کېږي.