استخباراتي موندنې ښيي چې تهران خپلو ډېرو توغندیزو سایټونو (مرکزونو) ته بېرته عملیاتي لاسرسی موندلی دی، چې په کې د هرمز تنګي په اوږدو کې د ۳۳ توغندیزو مرکزونو څخه ۳۰ یې شامل دي.
د امریکا استخباراتي ارزونه ښايي چې ایران لا هم د جګړې دمخه د خپلو توغندیو شاوخوا ۷۰ سلنه زېرمې او ګرځنده توغندي ویشتونکي (لانچرونه) له ځان سره لري.
د امریکا د یوې رسنۍ د راپور له مخې، د امریکا محرمې استخباراتي ارزونې ښودلې چې ایران د پام وړ توغندیزې وړتیاوې ساتلې دي؛ سره له دې چې د ټرمپ ادارې په وار وار ادعا کړې وه چې د تهران پوځ "مات شوی" دی.
نیویارک ټایمز راپور ورکړی چې د می میاشتې د پیل استخباراتي موندنې ښيي چې ایران خپلو ډېرو توغندیزو مرکزونو ته بېرته عملیاتي لاسرسی موندلی، چې د هرمز تنګي په اوږدو کې له ۳۳ مرکزونو څخه ۳۰ یې پکې شامل دي.
دغو ارزونو ته د نږدې کسانو په حواله، ورځپاڼې ویلي چې ایران لا هم د جګړې دمخه د خپلو توغندیو شاوخوا ۷۰ سلنه زېرمې او ګرځنده لانچرونه په واک کې لري. دغو ارزونو دا هم موندلې چې په ټول هېواد کې د ایران د توغندیو د زېرمه کولو او توغولو نږدې ۹۰ سلنه ځمکني (تر ځمکې لاندې) تاسیسات اوس "په نسبي یا بشپړ ډول فعال" دي.
"د پایښت وړ نه دی"
د سپینې ماڼۍ ویاندې "اولیویا ویلز" ویلي چې د ایران حکومت پوهیږي چې د دوی "اوسنی حقیقت د زغم وړ نه دی" او هر څوک چې فکر کوي ایران خپل پوځ بېرته رغولی دی، هغه یا "بې لارې (غلط فهمه)" دی او یا د ایران د اسلامي انقلابي ساتونکو ځواک (سپاه پاسداران) لپاره غږ پورته کوي.
سیمه ییز کړکېچ وروسته له هغه زیات شو چې امریکا او اسراییلو د فبروري په ۲۸مه پر ایران بریدونه پیل کړل، چې دا کار د تهران له خوا د اسراییلو او په خلیج کې د امریکا د متحدینو په وړاندې د غبرګوني بریدونو او د هرمز تنګي د تړلو لامل شو.
د پاکستان په منځګړیتوب د اپریل په ۸مه دوه اونیز اوربند نافذ شو، خو په اسلام اباد کې وروستیو خبرو اترو ونشو کړای چې یوې تلپاتې هوکړې ته ورسیږي. دا اوربند وروسته د ټرمپ له خوا د نامعلومې مودې لپاره وغځول شو. له هغه وخت راهیسې اسلام اباد هڅه کوي چې په ټپه ولاړې ډیپلوماسۍ ته بېرته ژوند ورکړي.
ټرمپ د جګړې د دایمي پای ته رسولو لپاره د امریکا وړاندیز ته د ایران وروستی ځواب رد کړ او هغه یې "په بشپړ ډول د نه منلو وړ" وباله.
