حوثيانو ویلي چې د سعودي عربستان د سمندري کلابندۍ له اعلان وروسته، هره سرغړونه د بندیزونو او بریدونو لامل کېدای شي.

د هغو برېښنالیکونو له مخې چې حوثيانو بېلابېلو شرکتونو ته لېږلي، د بېړۍ چلوونې شرکتونه باید په سعودي بندرونو کې مالونه بار یا ښکته نه کړي، او د دې کار ترسره کول به د دې لامل شي چې بېړۍ په "هر ځای کې" د یمني حوثيانو تر هدف لاندې راشي.

حوثيانو د دوشنبې په ورځ د سعودي عربستان پر وړاندې سمندري کلابندي اعلان کړه، چې له ایران سره د امریکا په جګړه کې یې یوه نوې احتمالي جبهه پرانیستله او له خلیج څخه بهر یې د انرژۍ نړیوالو سرچینو او سوداګرۍ ته ګواښونه زیات کړل.

د جولای د ۲۰مې په برېښنالیک کې، چې ډېرو شرکتونو ترلاسه کړی، راغلي: "بېړۍ د سعودي په هر بندر کې د مالونو له بارولو یا ښکته کولو څخه منع دي." په دغه پیغام کې چې رویټرز خبري اژانس هم لیدلی، زیاته شوې: "موږ ستاسو شرکت ته په کلکه سپارښتنه کوو چې په خپلو ټولو معاملو کې بشپړ احتیاط او دقت وکړي."

په برېښنالیک کې ویل شوي چې دا نوي شرایط د جولای په ۲۰مه، د ګرینویچ په وخت په ۱۲:۰۱ بجو نافذ شول. د حوثيانو د 'بشري عملیاتو د همغږۍ مرکز'  چې په صنعا کې دی، ویلي: "هر ډول دا ډول فعالیت به سرغړونکې بېړۍ له بندیزونو سره مخ کړي. سربېره پردې، هغوی د یمني وسله والو ځواکونو د عملیاتي لاسرسي په هره سیمه او هر ځای کې تر برید لاندې راتلای شي."

د سرې بحیرې  د سویلي دروازې تړل کېدل به د سعودي عربستان لپاره د هرمز تنګي یو مهم بدیل لاره له منځه یوسي او په نړیواله کچه د توکو د کمښت وېرې به زیاتې کړي. د سرې بحیرې تګ راتګ د ۲۰۲۳ کال له نومبر راهیسې، کله چې حوثيانو د فلسطینیانو سره د پیوستون په پلمه بریدونه پیل کړل، لا هم په بشپړ ډول نه دی عادي شوی.

د بشري عملیاتو د همغږۍ مرکز د حوثيانو هغه اصلي څانګه وه چې د ۲۰۲۳ او ۲۰۲۵ کلونو ترمنځ یې پر سوداګریزو بېړیو د بریدونو پر مهال شرکتونو ته خبرداریونه لېږل؛ هغه بریدونه چې یوازې د تېر کال په اکتوبر کې د غزې د اوربند په پایله کې ودرېدل.

یوې سرچینې چې دا برېښنالیک یې ترلاسه کړی، ویلي: "موږ په دې باور یو چې دا پیغام په سیمه کې د دوی د حضور د یادونې په مانا دی."

تېره اونۍ حوثي ډلې سعودي عربستان تورن کړ چې د صنعا پر هوايي ډګر یې هوايي برید کړی او په غبرګون کې یې پر سعودي خاوره توغندي وتوغول، چې په دې سره د څو کلونو ارامي ماته شوه. که څه هم ریاض په دې اړه څه ونه ویل، مګر د یمن په نړیواله کچه پېژندل شوي حکومت د دغه برید مسؤلیت ومانه او ویې ویل چې هدف یې د یوې ایراني الوتکې د ناستې مخنیوی و.

له یوې لسیزې راهیسې، هغه الوتکې چې د یمن فضا ته ننوځي، باید د سعودي په مشرۍ د ایتلاف څخه اجازه واخلي؛ هغه ایتلاف چې د یمن د حکومت ملاتړ کوي او وايي چې دا محدودیت د حکومت په غوښتنه پلي کوي.