د قطر دولتي رسنیو خبر ورکړی چې شیخ حمد بن خلیفه ال ثاني، چې د قطر د واکمن په توګه یې دا کوچنی خلیجي هیواد په ډیپلوماسۍ، رسنیو او پانګونه کې په یو نړیوال لوبغاړي بدل کړی و او بیا یې په داوطلبانه ډول خپل زوی ته د واک په سپارلو سره پخواني دودونه مات کړل، د ۷۴ کلونو په عمر  ومړ.

د قطر دولتي خبري اژانس د هغه د مړینې خبر ورکړی، خو د مړینې د لامل په اړه یې څه نه دي ویلي.

شیخ حمد، چې د ۲۰۱۳ کال په جون کې له ۱۸ کلنې واکمنۍ وروسته د امیر په توګه له واک څخه ګوښه شو، د انرژۍ له پلوه د بډایه قطر د هغو حیرانوونکو هیلو معمار و چې دا هیواد یې په لږه موده کې له یوې لیرې پرتې سیمې څخه د نړۍ په یوه مهمه څلورلاره بدل کړ. قطر په لندن کې د "هاروډز" (Harrods) مشهور پلورنځی لري او د "الجزیرې" په نوم یې ځواکمنه سټلایټ خبري شبکه بنسټ کېښود.

د قطر سیاسي نفوذ نن ورځ له شمالي افریقا څخه تر افغانستان پورې غځېدلی او دغه هیواد د ۲۰۲۲ کال د فیفا نړیوال جام کوربه توب وکړ، چې د نړۍ تر ټولو ډېر لیدل کېدونکی د فوټبال سپورتي تورنمنټ و. شیخ حمد، که څه هم له ډېرې مودې راهیسې له واک څخه لرې و، خو د نړیوال جام په پرانیستونکې لوبه کې د قطریانو له خوا په ډېرو تودو ولولو او چکچکو سره وستایل شو.

خو د شیخ حمد تر مشرۍ لاندې د قطر دغه پرمختګ او خپلواکو پالیسیو سیمه ییز او لویدیځ متحدین هم ځینې وختونه خپه کړي وو؛ په ځانګړې توګه له ایران، د فلسطین له وسله والې ډلې حماس او د مصر له اخوان المسلمین ډلې سره د نږدې اړیکو له امله.