د هند هوایي ځواک وایي چې یوې AN-32 ډوله الوتکې په جورهاټ کې د کښته کېدو پر مهال حادثه کړې، د پېښې د لامل معلومولو لپاره د څېړنو امر شوی دی.

د پوځ په یوه بیان کې راغلي چې د هند یوه روسۍ جوړه شوې پوځي ټرانسپورټي الوتکه د هېواد په لیرې پروت شمال ختیځ کې په یوې هوایي اډه کې د کښته کېدو پر مهال سقوط کړی دی.

په دغه بیان کې چې د شنبې په ورځ خپور شوی، راغلي: "د هند د هوایي ځواک یوې An-32 الوتکې نن په جورهاټ کې د کښته کېدو پر مهال سقوط وکړ. د پیښې د لامل معلومولو لپاره یوه تحقیقاتي کمېټه ټاکل شوې ده." په بیان کې د احتمالي مرګ ژوبلې په اړه نور جزییات نه دي ورکړل شوي.

د NDTV خبري شبکې د پېښې د ځای انځورونه خپاره کړي چې پکې له سیمې څخه د تور لوګی پورته کېږي او داسې ښکاري چې الوتکه په څو ټوټو وېشل شوې ده.