د تورکیې د ولسمشرۍ ماڼۍ د اړیکو رئیس برهان الدین دوران د جمعې په ورځ اعلان وکړ چې د اوکراین ولسمشر ولادیمیر زیلینسکي به د شنبې په ورځ د ترکیې د ولسمشر رجب طیب اردوغان په بلنه تورکیې ته سفر وکړي.
دوران وویل، په استانبول کې به د تورکیې او اوکراین ترمنځ د همکاریو د لا پیاوړتیا پر ګامونو او همدارنګه د سیمهییزو او نړیوالو پرمختګونو، په ځانګړې توګه د اوکراین پر وړاندې د روسیې د جګړې او د تور سمندرګي د امنیت په اړه خبرې وشي.
دا سفر په داسې حال کې ترسره کېږي چې تورکیه د جګړې د پای ته رسولو په هڅو کې ځان د یوه ډیپلوماټیک منځګړي په توګه ساتي، او ترڅنګ یې په تور سمندرګي کې د سمندري امنیت او ثبات د ساتلو هڅه کوي.
د تور سمندرګي امنیت او د سولې هڅې د اجنډا برخه دي
اردوغان او زیلینسکي وروستی ځل په سپټمبر کې په نیویارک کې د ملګرو ملتونو د عمومي اسمبلۍ د غونډې په څنډه کې سره لیدلي وو، چېرته چې دوی د تور سمندرګي د امنیت، د اوکراین د سمندري صادراتي دهلېز د فعالیت او د دوه اړخیزې سوداګرۍ د پراختیا پر لارو چارو خبرې وکړې.
زیلینسکي هغه مهال ویلي وو چې اوکراین چمتو دی چې تورکیه د سولې د خبرو اترو په اړه د درې اړخیزو مشرانو د غونډې کوربهتوب وکړي. د اوکراین د ولسمشر په وینا، اردوغان د دا ډول خبرو کوربهتوب ته چمتووالی ښودلی و.
تورکیې تر دې وړاندې په استانبول کې د روسي او اوکرایني پلاوو ترمنځ د خبرو اترو کوربهتوب کړی او د اوربند او تلپاتې جوړجاړي په برخه کې یې د ډیپلوماټیکو هڅو د اسانولو هڅه کړې ده.
تمه کېږي چې دا راتلونکې غونډه به دواړو مشرانو ته یو بل فرصت برابر کړي ترڅو د جګړې، سمندري امنیت او د تورکیې-اوکراین د همکاریو د راتلونکي په اړه خبرې اترې وکړي.
