د نړیوالو کړکیچونو په منځ کې د سرو زرو بیه د لومړي ځل لپاره له ۴۵۰۰ ډالرو څخه پورته شوه

سره زر او سپین زر د جیوپولیتیک او اقتصادي ناڅرګندتیاو او د فدرالي زېرمو د سود کچې د نرخ کمولو تمو د زیاتوالي په منځ کې په تاریخي ډول لوړې کچې ته رسېدلې دي.

د چهارشنبې په ورځ د سرو زرو بیه د هر اونس ۴٬۵۲۵.۹۶ ډالرو تاریخي ریکارډ ته لوړه شوه، چې شاوخوا ۱ سلنه زیاتوالی ښيي. دا زیاتوالی د امریکا او وینزویلا ترمنځ د زیاتېدونکو کړکېچونو او د امریکا د سود کچې د نورو کمښتونو د تمو له امله رامنځته شوی.

له دې تاریخي لوړې کچې ته تر رسېدو وروسته، د سرو زرو بیه د ۵:۵۰ تر وخته شاوخوا د هر اونس ۴٬۴۹۵.۹ ډالرو ته راټیټه شوه، خو لا هم د کلنۍ کچې له مخې شاوخوا ۷۲ سلنه زیاتوالی ښيي.

د سپینو زرو بیې هم له ۱ سلنې څخه زیاتې لوړې شوې او ۷۲.۷ ډالرو ته ورسېدې، چې دا یوه تاریخي لوړه کچه ده. د تېرو ۱۲ میاشتو په موده کې یې بیه شاوخوا ۱۴۴ سلنه لوړه شوې ده.

د خوندي پانګونو غوښتنه د نړیوال اقتصادي ودې د ټکني کېدو په اړه د اندېښنو له امله زیاته شوې، او همدارنګه د ۲۰۲۶ کال لپاره د امریکا د سود کچې د نورو کمښتونو پر شرطونو، په ځانګړي ډول وروسته له هغې چې د روان کال په درېیمه ربع کې د امریکا اقتصادي وده د تمې خلاف پیاوړې وه.

د امریکا ناخالص کورنی تولید (GDP) د درېیمې ربعې په جریان کې په کلني حساب ۴.۳ سلنه وده کړې، چې د بازار له تمو لوړه وه او په تېرو دوو کلونو کې تر ټولو لوړه وده بلل کېږي.

د واشنګټن او کاراکاس ترمنځ کړکېچونه هغه مهال زیات شول چې امریکا د وینزویلا سره تړلو د تېلو د لېږد پر ضد څارنه او پلي کوونکي اقدامات سخت کړل، چې د نړیوالو خامو تېلو د بهیر د احتمالي ګډوډۍ په اړه نوې اندېښنې راپورته کړې او د نړۍ جیوپولېټیکي بې ‌باوري یې نوره هم زیاته کړه.

د امریکا ولسمشر ډونالډ ټرمپ ادعا کوي چې دا هېواد د تېلو عواید د “غیرقانوني” کډوالۍ او امریکا ته د “مخدره توکو د لېږد” د تمویل لپاره کاروي.

د بیو د دې لوړېدو بل مهم لامل د مرکزي بانکونو له خوا د زېرمو د پیاوړتیا لپاره د سرو زرو پېرودل دي.