بیجینګ هغه ادعاوې رد کړې چې ګواکې ایران به تر ۴۰۰ پورې په چین کې جوړ شوي د هوايي دفاع د توغولو سیسټمونه ترلاسه کړي؛ بلخوا پاکستان هم په دغه احتمالي لېږد کې د کوم رول لرل په کلکه رد کړي دي.
چین د پنجشنبې په ورځ د رسنیو هغه راپور رد کړ چې ګواکې ایران به په راتلونکو څو اونیو کې تر ۴۰۰ پورې په چین کې د جوړ شویو او پر اوږه د اېښودل کېدونکو هوايي دفاعي توغندیو لومړۍ جوپه ترلاسه کړي. چین ویلي چې دا راپور "رښتیا نه دی او هیڅ حقیقت نلري."
د چین د بهرنیو چارو وزارت ویاندې 'مائو نینګ' په پېکینګ کې یوې خبري ناستې ته وویل چې هېواد یې په ډېرو مواردو کې د اړوندو مسایلو په اړه خپل دریځ په روښانه ډول بیان کړی دی. هغې زیاته کړه: "دا راپورونه حقیقت نلري او په بشپړ ډول بې بنسټه دي." نوموړې ټینګار وکړ چې چین "تل د سولې او جګړې د پای ته رسولو لپاره هڅه کړې ده."
پاکستان هم د چهارشنبې په ورځ هغه خبر په کلکه رد کړ چې پکې ادعا شوې وه چې اسلام اباد به د دغې جوپې لپاره د ټرانزیټي لارې په توګه وکارول شي.
د پاکستان د پوځ د عامه اړیکو څانګې اناتولیا خبري اژانس ته ویلي: "دا ټولې اوازې بې بنسټه او له حقیقت څخه لیرې دي. موږ دا ډول انګیرنې په کلکه ردوو."
رویټرز خبري اژانس تر دې وړاندې راپور ورکړی و چې ایران، چې له امریکا سره د روانې شخړې په ترڅ کې د خپلې دفاع پیاوړي کولو په لټه کې دی، تمه کېږي چې په راتلونکو اونیو کې به د هوايي دفاعي سیسټمونو لومړۍ جوپه ترلاسه کړي.
په دغه راپور کې د ناڅرګندو سرچینو په حواله ادعا شوې وه چې دغه لومړۍ جوپه به د چین په لوېدیځ کې له 'ارومچي' ښار څخه بار او د پاکستان له لارې به ایران ته ورسېږي.
