د ایراني رسنیو له قوله، په داسې حال کې چې امریکا پر دغه هېواد د بریدونو نوې لړۍ پیل کړې، د ایران په بېلابېلو برخو کې د چاودنو راپورونه ورکړل شوي دي.
د ایران دولتي تلوېزیون د هرمزګان ولایت په مرکز، بندر عباس کې د یوې چاودنې خبر ورکړی. نیمه دولتي "فارس" خبري اژانس ویلي چې د قشم ټاپو او شاوخوا اوبو کې د چاودنو غږونه اورېدل شوي، پداسې حال کې چې یوه بله چاودنه په سیریک کې هم راپور شوې ده.
د ایران رسمي خبري اژانس "ایرنا" د فارس ولایت په شیراز ښار کې د چاودنې خبر ورکړی. دغه اژانس وویل چې په تېرو څو ساعتونو کې د سیستان او بلوچستان ولایت په چابهار او کنارک ښارونو کې ۱۴ چاودنې اورېدل شوې دي.
"مهر" خبري اژانس ویلي چې د ایران په سویل کې د بوشهر اټومي برېښناکوټ ته نږدې د هوايي دفاعي سیسټمونو د فعالېدو غږونه اورېدل شوي. مهر په مرکزي ښار اصفهان کې هم د دوو چاودنو راپور ورکړی.
خو ایراني رسنیو وروسته د اصفهان ولایت د والي د امنیتي مرستیال له قوله وویل چې په دغه ولایت کې یې هر ډول دښمنانه برید یا چاودنه رد کړې ده. تر اوسه د احتمالي مرګ ژوبلې یا زیانونو په اړه کوم سمدستي راپور نه دی ورکړل شوی.
په ورته وخت کې، د امریکا مرکزي قوماندانۍ سنټکام ویلي چې دوی د عمومي قوماندان (ولسمشر) په لارښوونه پر ایران تازه بریدونه کړي دي. د دغې قوماندانۍ په وینا، د دې عملیاتو موخه د ایران د هغو پوځي وړتیاوو کمزوري کول دي چې په هرمز تنګي کې پر سوداګریزو کښتیو د بریدونو لپاره کارول کېږي.
