د پاکستان پولیسو د پنجشنبې په ورځ وویل چې د هېواد په شمال لوېدیځ کې پر یوې امنیتي پوستې په برید کې لږ تر لږه ۹ پولیس وژل شوي دي.
د خیبر پښتونخوا ایالت د پولیسو مرکزي دفتر په یوې اعلامیه کې ویلي، دا پېښه چې پر امنیتي ځواکونو د پرله پسې بریدونو تازه لړۍ ده، د چهارشنبې په شپه په هنګو ولسوالۍ کې شوې ده.
په دې سختې نښتې او ډزو کې ۲۸ نور پولیس ټپیان شوي، په داسې حال کې چې د پولیسو په ځوابي ډزو کې ۱۵ بریدګر هم وژل شوي دي.
پولیسو د دغه برید پړه پر تحریک طالبان پاکستان چې هغوې ورته "فتنة الخوارج" وايي اچولې ده. دا هغه اصطلاح ده چې پاکستاني دولت یې د ناقانونه ګرځول شوې ډلې، تحریک طالبان پاکستان (TTP) د وسله والو لپاره کاروي.
تحریک طالبان پاکستان له ډېرې مودې راهیسې د پاکستان په شمال لوېدیځ او سویل لوېدیځ کې پر امنیتي ځواکونو او حکومتي تاسیساتو په بریدونو کې ښکېل بلل کېږي.
د کورنیو چارو وزیر محسن نقوي دغه برید په کلکه وغانده او د وژل شویو سرتېرو له کورنیو سره یې خپله خواخوږي او ډاډګېرنه څرګنده کړه.
په دې وروستیو کې په خیبر پښتونخوا او سویل لوېدیځ بلوچستان ایالت کې د وسله والو بریدونو څپه خورا زیاته شوې ده.
