تر دې وړاندې د اسرائیلو دفاع وزیر اسراییل کاټز ویلي وو چې پوځي ځواکونه به په جنوبي لبنان کې اشغال شوې سیمې پرې نږدي، "حتی که امریکا د وتلو غوښتنه هم وکړي."
د چهارشنبې په ورځ په جنوبي لبنان کې د هغه څه پر مهال چې پوځ یې "عملیاتي فعالیت" بولي، یو اسرائیلی سرتیری ووژل شو او بل ټپي شو.
د پنجشنبې په ورځ په یوې رسمي اعلامیه کې، پوځ د وژل شوي سرتیري هویت ۳۲ کلن ماسیټر سارجنټ "باسیل سوید" ښودلی، چې د ډرایور په توګه یې دنده ترسره کوله.
اسرائیلي ورځپاڼې "یدیعوت احرونوت" د پوځي بیانیې له قوله لیکلي چې دا سرتیری د چهارشنبې په ورځ په جنوبي لبنان کې "د تېلو د یوه نظامي ټانکر د اوښتو" له امله وژل شوی دی. په راپور کې زیاته شوې چې په دې "عملیاتي پېښه" کې یو بل اسرائیلی سرتیری ټپي شوی دی.
دا په داسې حال کې ده چې د چهارشنبې په ورځ د اسرائیلو دفاع وزیر اسراییل کاټز هوډ وکړ چې د دوی پوځي ځواکونه به په جنوبي لبنان کې نیول شوې سیمې پرې نږدي، "حتی که متحده ایالات د وتلو غوښتنه هم وکړي."
دا څرګندونې په داسې حال کې کېږي چې لوړ پوړي اسرائیلي چارواکي لا هم په جنوبي لبنان کې د اشغال شویو سیمو پر کنټرول ټینګار کوي، سره له دې چې په دې وروستیو کې د امریکا او ایران ترمنځ یو تفاهم شوی چې پکې د لبنان حاکمیت او ځمکنۍ بشپړتیا ته د درناوي ژمنې شاملې دي.
اسرائیل لا هم د جنوبي لبنان ځینې سیمې تر اشغال لاندې ساتلي دي؛ ځینې یې له لسیزو راهیسې او ځینې نورې یې د ۲۰۲۳-۲۰۲۴ کلونو په جګړه کې نیولې دي. په خپلو وروستیو بریدونو کې اسرائیلي ځواکونه د لبنان خاورې ته تر ۱۰ کیلومترو ډېر ننوتي دي.
د لبنان د رسمي ارقامو له مخې، د ۲۰۲۶ کال د مارچ له دویمې راهیسې په لبنان کې د اسرائیلو په بریدونو کې له ۴۰۰۰ څخه ډېر کسان وژل شوي، تر ۱۲۰۰۰ ډېر ټپیان شوي او له یو ملیون څخه ډېر خلک بې ځایه شوي دي.
