درېیو مرستندویه سرچینو د دوشنبې په ورځ "اې ایف پي" (AFP) خبري اژانس ته ویلي، چې د طالبانو د امربالمعروف او نهي عن المنکر وزارت محتسبینو د ایران او افغانستان پولې ته نږدې شاوخوا ۲۰ تنه مرستندویه کارکوونکي د دې لپاره نیولي چې ږیرې یې پوره اوږدې نه وې.

په کابل کې طالب چارواکي د اسلامي شریعت له خپل ځانګړي تفسیر سره سم حکومت کوي او ویلي یې دي چې د نارینه وو ږیرې باید له یوې منګولې څخه زیاتې وي.

د هغو داخلي اعلامیو له مخې چې د دوو مرستندویه کارکوونکو لخوا د امنیتي اندېښنو له امله په پټه شریکې شوې دي، دغه کسان د شنبې په ورځ د اسلام کلا سرحدي بندر ته نږدې په هغو ادارو کې پر کار بوخت وو چې له ملګرو ملتونو سره همکاري کوي.

د مهاجرت نړیوال سازمان (IOM) په یوه داخلي اعلامیه کې ویل شوي: "د امربالمعروف محتسبینو د اسلام کلا په کمپ کې د ملګرو ملتونو د همکارو موسسو سیمه ییز نارینه کارکوونکي د ږیرو د لنډولو یا خریل له امله نیولي وو." اعلامیه زیاتوي چې ځینې دغه کارکوونکي په هماغه ورځ او پاتې نور یې بله ورځ خوشې شوي دي.

د طالبانو د امربالمعروف او نهي عن المنکر وزارت په دې اړه له تبصرې ډډه کړې، خو په هرات ولایت کې د دې ادارې یوه مسؤل، ضیاء الدین طیب، د نادولتي موسسو  د کارکوونکو نیول رد کړي دي. هغه AFP ته وویل: "د موسسو هیڅوک نه دي نیول شوي او نه هم زنداني شوي دي." خو نوموړي تایید کړه چې محتسبینو د بېلابېلو دولتي ادارو ۵ تنه کارکوونکي د لنډو ږیرو له امله نیولي وو.

یوې بلې مرستندویه سرچینې بیا ویلي چې محتسبین د اسلام کلا په بندر کې یوې ودانۍ ته ننوتل او ۲۰ تنه یې چې هلته یې د خدمتونو وړاندې کولو په بېلابېلو ادارو کې کار کاوه، ونیول. دغې سرچینې د خوندیتوب له امله د نوم نه ښودلو په شرط ویلي چې نیول شوي کسان د شنبې په ورځ "کهسان" ولسوالۍ ته لېږدول شوي وو.

که څه هم د افغانستان ډېری وګړي مسلمانان دي، خو په ۲۰۲۱ کال کې د طالبانو له بیا واکمنېدو وړاندې په لویو ښارونو کې خلکو اجازه درلوده چې خپله بڼه او ظاهر پخپله وټاکي. په تېر وخت کې هم په هغو سیمو کې چې د طالبانو تر کنټرول لاندې وې، نارینه وو به یا د وېرې او یا هم په خپله خوښه ږیرې پرېښودلې.