د تورکیې ولسمشر رجب طیب اردوغان د اروپایي کمیسیون له مشرې اورسولا فون ډیر لاین سره په ټیلیفوني خبرو کې د تورکیې او اروپایي ټولنې د اړیکو ترڅنګ د سیمه ییزو او نړیوالو پرمختګونو په اړه خبرې وکړې.
د تورکیې ولسمشر د اروپایي کمیسیون مشرې ته وویل چې سیمه ییز کړکېچونه د تورکیې او اروپایي ټولنې د اړیکو ستراتیژیک اهمیت یو ځل بیا په ګوته کوي.
د تورکیې د عامه اړیکو ریاست په خپله ټولنیزه پاڼه (NSosyal) کې وویل چې د سې شنبې په ورځ په دې ټیلیفوني اړیکه کې د سیمه ییزو او نړیوالو پرمختګونو ترڅنګ د تورکیې او اروپایي ټولنې پر اړیکو هم خبرې وشوې.
په دې خبرو کې اردوغان وویل چې تورکیه په سیمه کې په روانو شخړو کې د اوربند ساتلو او د سولې د تامین لپاره کار کوي؛ هغه زیاته کړه چې د هرمز تنګی هم باید هر څومره ژر چې امکان لري بېرته پرانیستل شي.
هغه زیاته کړه چې اسرائیل په سیمه کې د شخړو دوام غواړي او نړیوالو قوانینو ته سرغړونې ته دوام ورکوي، چې په کې هغه کړنې هم شاملې دي چې د "سمندري داړه مارۍ" په توګه یادې شوي. نوموړي پر اسرائیل د نړیوال فشار پر زیاتولو ټینګار وکړ.
د تورکیې ولسمشر همدارنګه ټینګار وکړ چې د اروپا د امنیتي ستراتیژۍ په نوښتونو کې د تورکیې شاملول به ګټور وي. هغه وویل چې د تورکیې او اروپایي ټولنې ترمنځ د ګمرکي اتحادیې تړون باید تازه (اپډېټ) شي او په ټولو برخو کې باید همکاري پراخه شي ترڅو اقتصادي ادغام پیاوړی او ګډې ګټې خوندي شي.
