د امریکا ولسمشر ډونالډ ټرمپ اعلان وکړ چې امریکایي کښتۍ به د دوشنبې له سهار څخه د هرمز له تنګي څخه د بهرنیو بندو کښتیو په خوندي ډول د تیرولو په خاطر د بدرګې کار پیل کړي.
ټرمپ دا هڅه یو "بشري اقدام" وباله او دغه نوښت ته یې د " ازادۍ پروژه" نوم ورکړ. هغه وویل چې ډېرې بندې پاتې شوې کښتۍ د لومړنیو اړتیاوو له کمښت سره مخ دي.
ولسمشر ټرمپ د اسرائیلي رسنۍ "کان نیوز" (Kan News) سره په خبرو کې وویل چې ده د جګړې د پای ته رسولو په اړه د ایران وروستی وړاندیز څېړلی او هغه یې "د نه منلو وړ" موندلی دی. سره له دې چې دا وړاندیز رد شوی، خو امریکا د یکشنبې په ورځ د تهران د وروستي ۱۴ ماده ییز وړاندیز په ځواب کې د هوکړې یوه نوې اصلاح شوې مسوده وړاندې کړه.
د امریکا مرکزي قوماندانۍ تایید کړه چې ځواکونه به یې د مې په ۴مه د بېړۍ چلولو د ازادۍ د بیا رغولو لپاره د "پروژې ازادي" ملاتړ پیل کړي. دغه ماموریت د لارښود توغندیو ویجاړونکو کښتیو، له ۱۰۰ څخه د زیاتو الوتکو او ۱۵۰۰۰ پوځي منسوبینو لخوا پیاوړی شوی دی.
د سینټکام قوماندان اډمیرل براډ کوپر وویل: "د دې دفاعي ماموریت لپاره زموږ ملاتړ د سیمې د امنیت لپاره اړین دی،" هغه دا هم یادونه وکړه چې امریکا خپله سمندري محاصره ساتلې ده.
په هرمز کې د کړکېچ زیاتوالی
دا اعلان په داسې حال کې شوی چې د بریتانیا د سمندري سوداګرۍ عملیاتو (UKMTO) راپور ورکړی چې د متحده عربي اماراتو د فجیره ښار په ۱۲۵ کیلومترۍ کې یو تېل وړونکې کښتۍ د نامعلومو توغندیو لخوا ویشتل شوې ده. که څه هم د کښتۍ ټوله عمله خوندي ده، خو د برید سرچینه لا هم معلومه نه ده.
د ټرمپ د وروستي اعلان په ځواب کې، د ایران د ملي امنیت کمیسیون مشر ابراهیم عزیزي خبرداری ورکړ چې د هرمز په اوبو کې د امریکا هر ډول لاسوهنه به د اوربند سرغړونه وي. هغه د واشنګټن وړاندیز شوی رول رد کړ او ویې ویل چې دغه تنګی به د ټرمپ د ټولنیزو رسنیو د پوسټونو له لارې اداره نشي.
